Bilboko Udalak inbertsio handia egingo du Pío Baroja plaza eraberritzeko. Guztira, 2.019.359,25 euroko aurrekontua bideratu egingo du. Lanak hamar hilabeteko epean egitea aurreikusita dago.

"Proiektuak ingurunean dauden eraikuntzekin integratzaile izan nahi du, eta erabilera orekatuak izan, oinezkoen atsedena hartzeari eta oinezkoen espazioari lehentasuna emanez". Halaxe azaldu du gaur goizean Asier Abaunza Obretako, Hiri Plangintzako eta Proiektu Estrategikoetako zinegotziak.

Udalaren planteamendua da plaza atseginagoa egitea, eta, horretarako, berdeguneak integratuko dira eta altzariak nola jarri kontuan hartuko da, egoteko eta topaketarako espazio gehiago sortzearren. Gainera, helburu horretan sakontzeko, haurrentzako jolas-eremua berritu eta handituko da, eta espazioa eta sareak egokitu egingo dira behin-behineko instalazioak -hornidura egokiarekin- integratu ahal izateko, ekitaldiak egin daitezkeela ikusita.

Era berean, hautatutako zoladurak ingurua antolatzen eta nortasun handiagoa ematen lagunduko du, eta horrela, argiekin eta aipatutako hiri-altzariekin batera, plazak izaera atseginagoa izango du, gozatzeko eta egoteko aukera emanez.

Gainera, aldameneko kalean, Uribitarte kalearen luzapenean, espaloiak zabalduko dira, zuhaitz berriak landatuko dira eta, handik datozen ibilgailuen abiadura murrizteko, aglomeratu inprimatua jarriko da.

Plazaren mendebaldeko espaloiaren zoladura ere handituko da, Nerbioi kalerako pasabidearen ondoan; bertan, trafikorako eta oinezkoentzat plataforma bakarra egongo da.

OINEZKOEN IBILBIDEAK ETA GUNE BEREIZIAK: ATSEDENA ETA JOLASAK

Plazaren barruko oinezkoen bideak igarobide-ardatzek definituko dituzte, bai plaza inguratzen dutenek, bai horien perpendikularrek. Horrela, bada, pasealekuaren eta Uribitarte kalearen paraleloan joango dira, eta Barroeta Aldamar kalearen eta Uribitarte zeharbidearen luzetara.

Gainerako espazioan, bi eremu bereiziko dira:

  • Atseden lekua, obalo-formakoa -Barroeta Aldamar kalearen luzapenak definitutako oinezkoentzako ibilbideak zeharkatuko du -. Espazio horretan, hiri-altzariak jarriko dira -tartean mahaiak-, eta zuhaitz berriak ere jarriko dira, itzal guneak sortzeko eta horrela atseginagoa izateko. Obaloaren erdirik txikienean joko geometriko abstraktuak egingo dira, granitozko adokinean inprimatuak.
  • Berdegune bat, haurren jolasak jartzeko, Uribitarte kalearen ondoan. Gaur egun dauden espazio berean jarriko dira jolasak baina eremu zabalagoa hartuko dute; izan ere, horretarako, dekorazio-iturria eraitsi egingo dute. Jolasek paisaia-izaera izango dute; izan ere, espazioaren topografia eta desnibelak aprobetxatuko dira. Horietan hainbat elementu txertatuko dira, eta kautxuzko lurzorua jarriko da txikienen segurtasunerako eta babeserako. Barroeta Aldamar kaletik datorren oinezkoentzako ibilbidetik hurbilen dagoen gunean beste berdegune bat jarriko da.

Loreei dagokionez, zazpi zuhaitz berri landatuko dira, bi espezietakoak: astigar gorria plazan eta urkia kalean.

LURPEKO APARKALEKURAKO SARBIDE BERRIA

Haurrentzako gunearen ondoan, plazako lurpeko aparkalekurako sarbide berria egingo da. Horretarako, baskulako eraikin zaharra eraitsiko da - gaur egun garajeetarako sarrera hortik egiten da, eta komuna, garita, kontrola, igogailua eta eskailera ere baditu-, komunikazio-elementuak bakarrik uzteko: eskailera eta igogailua. Igogailua ere berria egingo da. Zehazki, jasogailuaren makineria aldatuko da, eredu modernoago bat instalatuz, lehengo zuloan.

Aparkalekura sartzeko esku-hartze horrek itxitura eraberritzea ekarriko du; beirazkoa izango da eta metalezko ertzak izango ditu.

Aparkalekura Uribitarte kaletik sartuko gara zuzenean. Hain zuzen ere, sarreraren ondoan, Uribitarte kalearen ondoan, beste berdegune bat egingo da, galtzadak plazan duen inpaktua leuntzeko.

OBRAK EGITEA

Lanei ekiteko, egungo zoladurak, zolatak eta betegarriak kenduko dira, garajeetako forjaketa-kotara iritsi arte. Plazako altzari guztiak kenduko dira, baita apainketa-iturria, komun publikoa (obrak amaitu ondoren berriro jarriko da), argien zutabeak eta gainerako altzariak ere, orubea erabat hutsik uzteko.

Ondoren, egiturazko afekzioak saneatuko dira, halakorik balego, espazioa iragazgaizteko eta, ondoren, haurren jolasak eta berdegune berriak ipiniko dira. Horretarako, hormigoi arina, zementua eta buztin hedatua erabiliko dira, eta, horiek gauzatzeko, kontuan hartuko dira hornidura-sareak, aurreikusitako zimenduak eta berdeguneen eta haurren eremuen drainatzea; horiek lurperatuta geratuko baitira.

Era berean, uraz hornituko dira iturria eta komun publikoa, eta behin-behineko harguneak aurreikusiko dira behin edo behin ekitaldiren bat egiten bada, prest egon daitezen.

Proiektatutako saneamenduan euri-uren sare berri bat ipiniko da, eta argiztapen-sarea berrituko da.

AUZOKIDE PLANA

Pio Baroja plazan egingo diren obrak Auzokide Planaren barruan sartzen dira, uriko auzoak hobetzea helburu duen planaren barruan; gainera, 6. barrutiko auzotarrek lehentasuna eman diete lan horiei.

Auzokide Plana da Bilboko Udalak herritarren parte-hartzerako dauzkan tresnarik garrantzitsuenetako bat. Haren bidez, aurrekontua berdin banatzen da Bilboko 8 barrutien artean, hau da, 1,5 milioi euro barrutiko eta urteko.