Zirrikituetatik begira

Besterik ez huen merezi!

04.10.2020 | 01:16
Besterik ez huen merezi!

BEDTIDANIK erakutsi izan digute inori ez zaiola gaizkirik opa behar. Nola disimula, ordea, zenbaiten irristadek aurpegian marrazten diguten irri murritza? Duela lau urte, AEBko lehendakaritzarako lehian, Hillary Clintonez trufaka aritu zen Trump, hautagai demokratari pneumoniak eragindako ahuleriaren kariaz. Han ikusi genuen mitin batean, jo batera eta jo bestera, bizkarra konkortuta eta are lelo-aurpegi handiagoa jarrita, Hillaryren gaitza baliatzen aurkaria karikaturizatzeko. Donald bera da karikatura hutsa, mundu mailako lider batek izan behar lukeenaren alderantzizko eredua. Ez begirunerik, ez adimen emozionalik, ez enpatiarik, ez deus. Ezdeus. Etsigarria bezain ulergaitza da gisa horretako jendea, eskasa eta eskrupulurik gabea, gezurra puzkarra bezala botatzen duena, horrelako arduretara heltzen dela ikustea. Inongo agintarirentzat ez da erraza mundua gelditu duen pandemia honen kudeaketa. Inork ez zekien gairik, neurririk eta doinurik, baina inprobisatu egin behar, erabakiak hartu behar. Asmatu zein ez, bada edozein buruzagiri eskatu behar zaion gutxieneko zerbait: erantzukizuna. Maluruski, Trumpi ardura eskatzea arrantzura larrera joatea da. covid-19a eta honen balizko ondorioak erabat gutxietsi zituen; bere herrikideak hiltzen ari ziren bitartean txiste merkeak egiten aritu zen, lixiba dositxo batek ez ote lukeen xomorroa akabatuko. Ospitale militar batera eraman dute Trump, koronabirusaz kutsaturik. Orain karma dei-tzen diote. Euskaraz, ostera, "besterik ez huen merezi!". Makurrena da "Trump birusak" kutsatutako milioika herritarrek emango diotela berriz botoa handiki harroputzari, euskal amerikarren ehuneko handi bat tartean.

Blogs de Deia
Foros Deia