Ezkerraldea

Barakaldok enpresa teknologiko aurreratuen ekosistema bat garatzeko konpromisoa hartu du

18.03.2021 | 18:29

BARAKALDO. Amaia del Campo alkateak TECH Friendly enpresari egindako bisitan azaldu duenez, Barakaldoko Udalak enpresa teknologiko aurreratuen ekosistema bat garatuko du. 

"Ekonomia zirkularrak eta iraunkorrak, balio erantsi handiko zerbitzuetan oinarrituak eta berrikuntza teknologikoarekin lotuak, gure etorkizunaren oinarria izan behar du", ziurtatu du alkateak. "TECH Friendlyrenak bezalako proiektuek Barakaldon helburu hori lortzeko urrats seguruak emateko gaitasuna, talentua eta baliabideak ditugula erakusten dute".

Bileran, Amaia del Campoz gain, David Solla Barakaldoko Ekonomia Sustapeneko zinegotzia, Olatz Goitia BEAZeko zuzendari nagusia eta Imanol Cuétara SPRIko Enpresa Garapen eta Ekintzailetzako arduraduna izan dira. Enpresak Udal Elkartegian dituen instalazioak bisitatu ondoren, Illgner eraikinera joan da segizioa. Bertan, enpresaren bi bazkideek, Sergio Sernak eta Gonzalo Pellejerok, konpainiaren ibilbidea, egungo testuingurua eta etorkizuneko ikuspegia aurkeztu dituzte.

"Bidaia bizia izan da, eta urtebeteren buruan ekipoa eta fakturazioa bikoiztu ditugu", ziurtatu du Sernak. "TECH Friendlyk Hiri Berrikuntzari begirada berri batetik heltzeko apustu irmoa egin du, gure hiri eta lurraldeen eraldaketari estrategiatik helduz", adierazi du Pellejerok.

Gaur egun, TECH Friendlyk 100 hiri baino gehiagori laguntzen die hiri-agenda eta eraldaketa adimenduna ezartzeko prozesuetan, eta estatu-mailan kokatu da Erosketa Publiko Berritzailea (CPI) edo Smart City bezalako tresnen integrazioan. Halaber, hiri adimendunen esparruan estatuko proiektu garrantzitsuenetako batzuen buru da, eta, gainera, Spin-Off bat sortzea sustatu du ikuspen artifizialaren eta IoT muntaketa eta fabrikazioaren eremuan.

Bere bazkide fundatzaileen arabera, barakaldarren ingeniaritza honek Hiri Berrikuntza modu integralean lantzen du, estrategia geruzan diziplina anitzeko talde batekin eta irtenbide aurreratuen diseinutik hiri zerbitzuen eraldaketa digitalari aurre egiten dion ingeniaritza talde indartsu batekin.

SMART CITY BARAKALDO PLATAFORMA

TECH Friendlyren proiektuen artean, Barakaldoko Udalaren Smart City plataforma garatzea dago, udalerriko zerbitzu nagusiak kudeatu eta integratuko dituena. Tresna horrek erabakiak hartzea erraztuko du, bildutako eta prozesatutako informazioan oinarrituta, agertokiak simulatzea eta iragarpenak egitea politiken plangintzari begira.

Halaber, plataforma horri esker, hainbat zerbitzu publiko koordinatu eta integratu ahal izango dira, bai eta herritarrei eta enpresei informazioa zabaldu ere, Open Data eta aplikazioen sareetatik, sentsoreen azpiegituretatik eta gehitzen eta integratzen doazen gainerako informazio-iturrietatik jasotako datuak oinarri hartuta.

Sistemak, gainera, bost funtzio ditu, funtsezkoak izango direnak udalerriko enpresa eta kontsumitzaileen datuak tratatzeko, eta, ondoren, estrategiak modu eraginkorragoan taxutzeko, Barakaldo "Smart city" izateko helburu globalerantz bultzatzeko.

Plataforma hori, zalantzarik gabe, funtsezkoa da hiri moderno eta adimentsu baterako trantsizio-prozesurako. Hiri hori lantzen ari da jada, eta xede horretarako gainerako baliabideekin integratuko da.

noticias de deia