Auzoaren erdigunea

Martxan da Gurutzetako plaza eraberritzeko proiektua

22.12.2020 | 19:07

BARAKALDO. Martxan da Gurutzetako plaza eraberritzeko Barakaldoko Udalak martxan jarritako proiektua. Oraindik lizitazio prozesuan dagoen arren, ezagutzera eman dira lanen nondik norako batzuk. Esate baterako, plazaren irisgarritasuna hobetuko da, eta pasabide izateari utzi eta txikientzako eta helduentzako topagune eta aisialdirako gune bihurtu.

"Gurutzetako plaza auzoko gunerik ezagunenetakoa da. Hala ere, antolaera guztiz deserosoa da auzoko bizilagunentzat, hainbatetan espazio hori birformulatzeko eskatu baitigute, adierazi du Amaia del Campo Barakaldoko alkateak.

Horrela, datorren urtarrilaren 4ra arte, obra hau egin nahi duten enpresek beren eskaintzak aurkeztu ahal izango dituzte, 1,9 milioi euroko gehieneko zenbatekoarekin. Lan honen helburuak lau izan daitezke: gune honen iriste-erraztasuna hobetzea; auzoarentzako bilgune eta aisialdirako gune bihurtzeko igarobide izatea lortzea; adingabeak eta adinekoak dituzten familientzako erabilera-eremu diferenteak eta espezifikoak sortzea, eta orain plazan nagusi den asfaltoaren grisarekin amaitzea eta irudi alaiagoa eta dinamikoagoa ematea berdeguneekin. "Hori izan zen plaza honetan espazio desberdin bat sortzera bultzatu gintuen arrazoi nagusia, auzoaren eskaerei modu ordenatuan erantzungo diena, espazio erosoago eta erabilgarriago bat bihurtuz eta hainbat kolektiborentzat zerbitzuak eskainiko dituena", adierazi du alkateak. "Plazaren izaera urbanoa berreskuratu behar genuen, eta herritarren joan-etorri arinago eta atseginagoaz lortuko dugu, oztopo arkitektonikoak kenduz eta arrapalak dituzten sarbideak sortuz, mugikortasun urriko pertsonak plazara sar daitezen. Gainera, eguzkitik eta euritik egun baino hobeto babesteko pergolak gehituko dira", azpimarratu du.

HAUR-PARKE BERRIA ETA ADINEKOENTZAKO ATSEDEN-GUNEA

Proiektuak aurreikusten du, halaber, haurrentzako jolasak jartzea, pergolan bertan erakarpen-polo bat sortzeko, adin desberdinetakoek bat egin dezaten. Plazaren izkinetako batean, gaur egun haur-jolasak eta iturria dauden tokian, atsedenerako eta deskonexiorako gune bat egongo da, adinekoentzat. Gune horretan, gainera, jolas kognitiboak kokatuko dira.

Bestalde, plazaren itxura bisual grisa leundu eta itxura alaiagoa eta biziagoa eman behar zaio. Ildo horretan, elkarren artean konektatutako geometriak eta zirkulazio-fluxuak sortuko dira, hiri-altzarien itxurarekin bat etorriko diren babes-elementu eta akaberekin. Horretarako, harmaila moduko batzuk sortuko dira, zoladura gogorrak eta soropil artifizialak izango dituztenak, kokapenaren eta erabileraren arabera.

"Finean, Gurutzetako plaza espazio iriste-erraz eta atsegina izatea bilatzen dugu, pasabide izateari utzi eta guztiontzako topagune izatea, alegia", esan du alkateak.