BILBO. Uriko gazteei bideratutako birziklapenari buruzko 'Birziklatu! - ¡Recicla!' izeneko kanpainaren bosgarren edizioa jarriko du martxan Bilboko Udalak datorren astean, Ecovidrio eta Ecoembesekin batera. Kanpainaren helburua etxean eta eguneroko bizitzan hiri-hondakinak biziklatzearen garrantziaz ohartaraztea da.

Otsailaren 1ean, astelehena, programa honen lehenbiziko saioak abiatuko dira, eta martxoaren 31ra arte garatuko da. Honako honetan Bilboko Bigarren Hezkuntzako eta Lanbide Heziketako 25 ikastetxek parte hartuko dute; guztira, 16 eta 18 urte bitarteko 1.800 neska-mutil.

Kurtso honetako berritasuna da, bizi dugun osasun-egoera ikusita, ikastetxe bakoitzari prestakuntza-saioak on-line egiteko aukera eskaintzea. Zentzu horretan, prestakuntza telematikoa eskaini dezaketen hezitzaileak daude, bai ikastetxeek hala eskatu dutelako, bai taldeen edo klaseen balizko konfinamendu edo isolamendu egoerak konpontzeko.

Ekimena bultzatu duten erakundeek eskola-komunitatean eragiten dute, kolektibo hori oso lotua dagoelako ingurumenaren arloko egunean eguneko gorabeherekin, bai curriculumaren aldetik, bai udalerriko proiektuetan duten partaidetzagatik. Eta, baita ere, nork bere familiaren barruan bozgorailua izateko daukan gaitasunagatik, hondakinak jatorrian bereizi eta behar bezala birziklatzeak duen garrantziaz ohartarazteko.

Kanpaina honek zenbait helburu dauzka:

  • Hiri-hondakinen inguruko ezaguera areagotzea, hondakinen hierarkia azpimarratuta: gutxitzea eta birziklatzea.
  • Azpimarratzea etxean sortzen ditugun hondakinengatik pertsona bakoitzak dituen garrantzia eta erantzukizuna. Horretarako, kontzientzia eta sentsibilitatea sortu behar dira, norberak arazoa konpontzeko konpromiso pertsonala hartu dezan.
  • Kanpainan parte hartzen dutenak bultzatzea jarrera aldaketa izan dezaten eta, horrela, hondakin gutxiago sortu eta sortutakoak behar bezala bereizteko.
  • Ekimenak eskolako komunitate osoa sartzen du hondakinak modu egokian bereiztearen aldeko ekintzan, ingurumenaren arloko sentsibilitate jasangarriagoaren bozeramaile bihurtuta.

SAIOA IKASGELAN

Geletan nahiz telematikoki egingo den lana bi ordukoa izango da gutxi gorabehera, eta hiru ataletan dago sailkatuta:

  • Lehenengo atalean, hondakinak murrizteari eta berriro erabiltzeari buruzko edukiak jorratuko dira. Kontsumoa bultzatzeko gaur egun erabiltzen diren salmenta-teknikak bezalako gaiak aztertuko dira, bai eta saltoki handiek gehiago saltzeko erabiltzen dituzten merkataritza-estrategiak ere. Helburua da eztabaida piztea kontsumo arduratsurako jarraibideen inguruan.
  • Bigarrenean objektuen berrerabilpena jorratuko da.
  • Eta, hirugarren saioan, luzeenean, birziklatzea izango da ardatza; etxean eta eguneroko bizimoduan hondakinak modu egokian bereiztea landuko da. Jolas-dinamika baten bidez, lortu nahi da nerabeek barneratzea edukiontzi bakoitzera zer bota daitekeen eta zer ez, arreta berezia jarrita edukiontzi bakoitzera zein hondakin ez den bota behar.