Covid-19ak Grupo Coleccionismo San Fausto taldeari eragotzi egin zion iaz beraientzat ohikoa den jardunaldi bat ospatzea. Zehazki, pertsonaiaren bati edo gertaera, lorpen... bati eskaini ohi dioten zigilua eta zigilu-marka aurkezten dutenean. Aurten, Athletic, edo, zehatzago esanda, taldeak azken hilabeteetan jokatu dituen hiru finalak. Joan den larunbatean zigiluaren eta zigilu-markaren aurkezpena egin zuten Ibaigane kultur etxean, urtero bezala. Bertara jende dezente hurbildu zen Athleticek jokatutako finalak gogoratzeko zigilua eta gutun-azala eskuratzera. Azpimarratzekoa da Basauriko talde honetako kideak zigilurik gabe geratu zirela, hau da, eraman zituzten guztiak saldu zituztela. Hala ere, larunbatean zigilu guztiak saldu zituzten arren, gehiago izango dituzte eskuragarri, eta astearteetan arratsaldeko 19:00etatik 20: 00etara taldearen egoitzan erosi ahal izango dira, Ibaiganeko kultur etxean ere.
Ideiari dagokionez, Feliciano Vez taldeko presidenteak aitortu duenez, “erraza izan da erabakitzea”. Urtero “egun hau ospatzen dugu, eta, oraingo honetan, zigiluko protagonista izateko bezain gai polita zela uste genuen”. “Beti izaten dugu harrera ona, eta asko izan dira salgai jarri ditugun zigiluak eta bere zigilu-markak”, azpimarratu du. Gehien saldu zirenen artean, “Iñaki Azkuna Bilboko alkate ohiarena izan zen, eta 3.000 unitate egin genituen”, gogoratu du. Baina asko atera dituzte eta hauen artean kirolari asko ere izan dira; Piru Gainza basauritarrari, Athleticeko futbolariari eskainitako zigilua ere, maitasun bereziz gogoratzen du.
Aurtengo kasuan, Ibaiganera hurbildu zirenak hiru artikulurekin egin ahal izan ziren; alde batetik, zigilua, zigilu-marka eta gutun-azala, non zigilua eta zigilu-markarekin markatzeko aukera eman zuten. Zigiluari dagokionez, “kopa agertzea nahi genuen, baina azkenean Txapeldun Supercopa 20/21 jarri behar izan dugu”. Zigilu-markan “bai, hiru kopak agertzen direla”. Gutunazalean, mezu bat eta irudiak aukeratu dituzte. Kasu honetan, “partida hauek jokatu dituzten taldeen ezkutuak”, hau da, Athleticena, Realarena eta Bartzelonarena. Baita esaldi bat ere; “Un recuerdo para toda la afición del Athletic”.
40 urte presidente bezala
Felicianorentzat oso urte berezia da hau. Izan ere, 40 urte bete ditu Basauriko bildumagile talde horretako presidente gisa. Sortu zuten lehen zigilu-marka “Gernika, Gernikara” izan zen, eta egun horretan bertan izan ziren “Gernikako eta Basauriko alkateak”. Ordutik, 48 zigilu egin dituzte eta “horretan jarraituko dugu ahal dugun arte”. Feliciano bildumazale amorratua da, batez ere zigiluena. Hainbat gai edo pertsonaiari buruzko bildumak ditu, zigilu, argazki eta pegatinen bidez. 15 urte zituela hasi zen eta bilduma asko ditu. Athletic taldeari buruzko beste bat, “ehun urte baino gehiagoko historia biltzen duena, bai argazkiekin, sarrerekin...”.
Pilotari edo zesta-puntari buruzko material asko biltzea ere lortu du, baita pertsonaia historikoetan zentratutako hainbat ere, Agirre Lehendakaria, San Frantzisko Javier eta Loiolako Inazio, besteak beste. Bere bildumetatik, duten material baliotsuaz gain, Felizianok berak inprimatzen dien berezitasuna nabarmentzen du.
Gainera, argazkiei, sarrerei edo eranskailuei testuak gehizten dizkie beti informazio gehiago emateko. Partiden emaitzak, hegazti-espezieak, edota Agirreren 12 argazkiren bidez asmatutako istorio txiki bat, “beti miretsi izan dudan pertsonaia”.
Udalari eskerrak ematen dizkio “beti laguntzen digulako zigiluak aurrera ateratzeko”, eta uste du “pertsona asko erakartzen dituen gai interesgarria” dela, “bilduma egitea gauza polita delako, historia gogoratzea, gertaera garrantzitsuak eta oroitzapen asko gordetzen laguntzea”.
“Zigilua ateratzeko aurtengo gaia aurkitu eta aukeratzea oso erraza izan da”
Grupo Coleccionismo San Fausto
