Barakaldok prestakuntzarako laguntzen ordenantza eguneratu du

Ostiral honetan goizean, ekainaren 26an, Barakaldoko Udalaren Kultura zinegotzi Nerea Canterok Udalbatzak Barakaldoko Gazteen Prestakuntza eta Ikasketetarako Dirulaguntzak Emateko Ordenantza Arautzailea aldatzea onartu duela eman du ezagutzera. Aldaketa horren helburua araua egungo errealitatera egokitzea eta gazte eta familia gehiagok laguntza horiek jaso ahal izatea erraztea da.

"Ordenantzaren helburua Barakaldoko gazteen prestakuntzak eta ikasketek eragindako gastuak ordaintzen laguntzea da, haien prestakuntza aukerak eta emantzipazi prozesuak baldintza ditzaketen zailtasun ekonomikoak murrizten lagunduz", gogorarazi du Canterok.

Araudiaren berrikuspena Hezkuntza arloaren proposamen tekniko batetik abiatzen da. Bertan, ordenantza egungo egoeretara egokitzeko doikuntzak eta hobekuntzak egiteko beharra antzeman zen.

Berrikuntza nagusien artean, arauan jasotako zenbateko ekonomiko guztien eguneratzea nabarmentzen da, bai laguntzak jasotzeko errenta-mugak, bai diruz lagundu daitekeen ehunekoa zehazteko erabilitako oinarriak. Eguneratze hori egiteko, kontuan hartu da Kontsumoko Prezioen Indizeak (KPI) ordenantza onartu zenetik gaur egun arte izan duen bilakaera. Aurrerantzean klausula berri bati esker, eguneratze hori automatikoki egingo da urtero, KPIren bilakaeraren arabera, ordenantzaren aldaketa berriak izapidetu beharrik gabe, horrela, ordenantzaren kudeaketa arinduz eta "laguntzek bizi kostuaren igoerei erantzuteko gaitasunari eutsiko diotela bermatuz", adierazi du Canterok.

Baliabide publikoen erabilera eraginkorragoa

Idazketa berriak errentaren kontzeptuaren definizio zehatzagoa ere jasotzen du dirulaguntzak emateko ondorioetarako, eta ezartzen du PFEZren zerga oinarri guztien oinarri hartuko dela. Datu garrantzitsu gisa, eguneratzeak baditu baliabide publikoen erabilera optimizatzeko aldaketa batzuk ere, hala nola telefono mugikorren erosketa diruz laguntzeko aukera kentzea eta ekipo informatikoak erosteko laguntza lau urtean behin bakarrik eskatu ahal izatea ezartzea.

Aldaketaren tramitazioan zehar, EH Bildu bezalako talde politikoek egindako hainbat ekarpen gehitu dira. Zehazkiago, material profesionala erostea sartzen da diruz laguntzeko moduko material gisa: "laguntzen kudeaketan jasota zegoen praktika bat da, baina orain ordenantzan esplizituki jasota dago", zehaztu du zinegotziak.

Era berean, deialdia zabaltzeko betebeharrak indartu dira. Deialdia udal liburutegietan, gazteria zerbitzuetan, Udaleko sare sozialetan eta Barakaldoko udal ikastetxeetan iragarri beharko da, "informazioa ahalik eta onuradun gehienengana irits dadin", aurreratu du.

Deialdi finkatua eta beharrezkoa

Prestakuntzarako laguntzek eskari handia dute 18 eta 35 urte bitarteko Barakaldoko gazteen artean. Azken hiru ekitaldietan 560 eskaera jaso dira guztira, eta horietatik 331 onartu dira. 237.000 euro baino gehiago bideratu dira udalerriko gazteen Página 3 de 6 ikasketak eta prestakuntza laguntzera hizkuntzak, masterra, prestakuntza-zikloak eta material informatikoa eskuratzea.

"Datuen bilakaerak erakusten du aurkeztutako eskabideen kopuruak gora egin duela pixkanaka, 2023an 178 izatetik 2025ean 196 izatera igaro baita, eta horrek agerian uzten du udal programa horrek Barakaldoko familientzat duen garrantzia", adierazi du Canterok.