Hemen da Hiriko Soinuak musika lehiaketaren edizio berri bat. Barakaldoko Udalak Euskadi mailan artista berriak bilatzeko helburua duen ekimen honen zortzigarren edizioan parte hartzeko izena emateko epea ireki du, uztailaren 2ra arte. Lehiaketak Bizkaiko Foru Aldundiaren eta BBKren babesa izaten jarraitzen du.
Sarien artean, Gaua Produccionesen estudioetan disko bat grabatzea, ekoiztea eta masterizatzea, kategoria nagusiko talde irabazlearentzat eta Barakaldoko talde onenarentzat. BBK-Berdintasun eta Euskara sarietako irabazleek, ordea, 4 abestiko EP bat grabatuko dute.
Barakaldo, BBK-Berdintasun eta kategoria nagusiko bederatzi finalistek zuzenean joko dute irailaren 26an Barakaldoko San Bizente parkean egingo den finalean. Epaimahai profesionalak erabakiko du, zuzenean, Euskarazko artistarik onena.
Lehiaketako lau kategorietako proiektu irabazleak urriaren 23an eta 24an arituko dira Herriko plazan egingo den festibalean, ibilbide ezaguna duten taldeekin batera. Finala eta jaialdia doakoak izango dira.
"Iaz Barakaldoko 39 proiektuk eman zuten izena, parte-hartzaile guztien % 27, eta % 30eko hazkundearekin 2024ko zifrarekiko. Euskarazko artisten ordezkaritza ere handitu zen, 64 inskripzio guztira; baita BBK-Berdintasun sarirako hautagai izan ziren proiektuena ere. Gainera, parte hartze orokorrak etengabe egin du gora 2019ko lehen edizioaz geroztik. 146 parte-hartzaile izatea zifra oso ona da Hiriko Soinuak lehiaketa batentzat. Baina nahiz eta listoia oso altu dagoen, hazten jarraitzeko eta, oro har, Euskadiko talentu berriei eta, bereziki, Barakaldokoei laguntzen jarraitzeko ilusioa daukagu. Parte-hartzearen zifrak alde batera utzita, saritutako proposamenen kalitatea nabarmendu daiteke. Aurreko edizioetan, Sara Zozaya, Monday Potions, Laztana Laztana, Deep Sea Monk edo Edgar Allan Pop bezalako artistak saritu ditugu, besteak beste. Publikoaren eta berezitutako komunikabideen onespena daukaten proiektuak, alegia. Onena espero dugu lehiaketaren zortzigarren edizio honetatik eta sortzen ari diren artista eta taldeak parte hartzera animatzen ditugu ", adierazi du Jonathan Martin Barakaldoko Udaleko Gazteria zinegotziak.
NOLA PARTE HAR DAITEKE?
Barakaldoko Udalaren webgunean dagoen izen-emate fitxa bete eta hirikosoinuak@gmail.com helbidera bidali uztailaren 2a baino lehen (2a barne), mp3 formatuko 2 abestirekin, promozio-argazki batekin eta proiektuaren biografiarekin batera, eta taldekideen NANaren edo errolda-ziurtagiriaren fotokopia, jatorria EAEkoa dela egiaztatzen duena. Gutxienez Barakaldon erroldatutako kide bat dutela egiaztatzen duten musika-proiektuek Barakaldoko Artista Onenaren saria jasotzeko aukera izango dute, baita gainerako kategorietakoak ere (behean adierazitako baldintzak betez gero). Taldekideen % 50, gutxienez, emakumeak direla egiaztatzen duten musika-proiektuek BBK-Berdintasun Saria lortzeko hautagai izango dira, gainerako kategorietan parte hartzeaz gain (behean adierazitako baldintzak betetzen badituzte).
