Síguenos en redes sociales:

Gazteentzako udalekuak abiaraziko ditu Ermuak

Bi aste izango dira; ekaineko azkena eta uztailekoa lehena 2009 eta 2013 urteen artean jaiotakoentzat

Deia

Bilbao | 17·05·26 | 06:00 | Actualizado a las 17:45

Gazteentzako udalekuak abiaraziko ditu ErmuakE. U.

Datorren asteazkenean, maiatzaren 20an, irekiko duErmuko Udalak 'Uda Gazte Jolasak' izeneko udalekuetan parte hartzeko izena emateko epea, ekainaren 3ra arte zabalik egongo dena. Eskaera Abiapuntun bertan aurkeztuz edo Egoitza Elektronikoaren bidez egin ahal izango da. Aurten, programa hau 2009 eta 2013 urteen artean jaiotako hogeita hamar gazterentzat eskainiko dira plazak. Jardueraren datak ekainaren 29tik uztailaren 3ra eta uztailaren 6tik 10era izango dira.

Aste bakoitzean izena emateak 81,60 euroko kostua izango du -163,20 euro bietan bada-, Kulturako zerbitzu orokorrengatiko tasa arautzen duen 23. ordenantzan ezarritakoaren arabera. Familiek hobari aplikagarriak izango dituzte familia ugaria, guraso bakarrekoa bada edo bi anai-arreba edo gehiago inskribatzen badira; kasu horretan, 40,80 euro ordainduko dituzte, izena ematen duten aste kopurua edozein dela ere. Ordainketa parte-hartzaileen zerrenda jakin ondoren egin beharko da, ordainagiria Abiapuntun edo Egoitza Elektronikoaren bidez aurkeztu beharko delarik, ekainaren 9tik 16ra bitartean.

Ermuko gazteentzako udalekuen kartela.

Bi asteko jarduerez gozatzeko eta lagun batekin joateko aukera

Asteko plaza kopurua 30 gazte izango da, iaz baino hamar gehiago. Aurkeztutako eskabideen kopuruak aurreikusitako plazak gainditzen baditu, zozketa publikoa egingo da ekainaren 8an, udaletxeko osoko bilkuren aretoan, goizeko 9:00etan.

Programak hainbat jarduera aurreikusten ditu herrian bertan eta herritik kanpo, besteak beste, Mendexako abentura parkera joatea, Gorlizko koltxonetara, hondartzara edo Sopelako aterpetxean gau bat pasatzea.

Gazte bakoitzak eskaera bana aurkeztu ahal izango du, bertan aste bat edo bi aukeratuz, eta, ohi bezala, lagun batekin izena emateko aukera izango du. Horretarako, aitak, amak edo legezko tutoreak adingabea inskribatu beharko du, eta inskripzio horretan bertan, udalekuetan parte hartu nahi duen pertsonaren izena adierazi beharko du. Era berean, beste pertsonak ere banaka eman beharko du izena, eta lehenengoarekin joan nahi duela adierazi inskripzio-agirian.