Zabalik Markina-Xemeingo Karmen jaietako kartel lehiaketa

Markina-Xemeingo Udalak 2026ko Karmen Jaietako kartel lehiaketarako deialdia zabaldu du, eta parte hartu nahi duten guztiek maiatzaren 25eko 14.30ak arteko epea izango dute euren proposamenak aurkezteko.

Lehiaketa hau herritarren sormena sustatzeko plataforma garrantzitsua izateaz gain, jaietako nortasuna eta herri-kulturaren isla bihurtzen da urtero. Lehiaketak bi kategoria nagusi izango ditu parte-hartzaileen adinaren arabera: nagusien kategoria, 16 urte edo gehiago dituztenentzat, eta umeena, 16 urtetik beherakoentzat. Parte-hartzea librea da, bakarka zein taldeka egin daitekeelarik. Berrikuntza gisa eta aukera berdintasuna bermatzeko asmoz, iazko saridunek ezingo dute aurtengo edizioan parte hartu. 

Sorkuntza prozesuari dagokionez, teknikari dagokionez askatasun osoa dago, baina baldintza tekniko zehatz batzuk bete beharko dira. Gainera, debekatuta dago inteligentzia artifiziala erabiltzea irudiak sortzeko. Kartelean derrigorrez agertu beharreko testua honako hau da: KARMEN JAIAK 2026 MARKINA-XEMEIN. Uztailaren 15etik 19ra. 

Udalak azpimarratu du karteleko irudiek genero ikuspegia errespetatu behar dutela. Horrela, debekatuta dago irudi edo hizkuntza sexistak erabiltzea, baita rol estereotipatuetan oinarritutako aurreiritziak edo homofobia eta xenofobia sustatzen dituzten lanak ere.

Lanak udaletxeko Berton bulegoan (goizez), Udaltzaingoan (arratsaldez eta larunbatetan) edo Uhagon kulturgunean entregatu daitezke. Egilearen anonimotasuna babesteko, sistema berezi bat erabiliko da: kartelaren atzealdean goitizen bat jarri beharko da eta, horrekin batera, gutun-azal itxi batean egilearen datu pertsonalak sartuko dira. Euskarri digitalean aurkezten dutenek USB bidez egin beharko dute, prozedura berbera jarraituz. 

Bestalde, epaimahaia udaleko bi ordezkarik eta arte plastikoetan adituak diren hiru herritarrek osatuko dute. Nagusien kategoriako irabazleak 500 euroko saria jasoko du, eta umeen mailakoak, berriz, 150 euro. Aurkeztutako lan guztiak ikusgai jarriko dira udal sarreran.