Jarduera turistikoak gora egin du Aste Santuan Durangon

Durangoko Udalakaste honetan eman ditu ezagutzera Aste Santuko turismo jardueraren datuak, benetan onak izan direnak. Apirilaren 2tik 5era bitartean, 307 bisitari izan ziren udalerrian, Turismo Bulegoaren datuen arabera. Gainera, 227 kontsulta eta 174 zerbitzu eman ziren.

Kontsulten azterketari dagokionez, apirilaren 3a izan zen jende gehien bildu zen eguna, 87 kontsulta izanik, ondoren apirilaren 5ean 57 kontsulta, apirilaren 2an 46 kontsulta eta apirilaren 4an 37. Ikuspegi soziodemografikotik, emakumeen presentzia nabarmen handiagoa izan zen (% 56,83), gizonena baino (% 43,17). Adin-tarteen arabera, helduak izan ziren nagusi, kontsulten % 90,75a, eta haurren (% 3,53), gazteen (% 3,96) eta hirugarren adinekoen (% 1,76) parte-hartzea askoz txikiagoa izan zen.

Jatorriari dagokionez, kontsulta gehien jasotako taldeak Estatutik etorritakoak izan ziren (% 39,65), ondoren Euskal Herritik (% 34,36), Durangotik bertatik (% 12,77) eta atzerritik etorritakoak (% 13,22). Arreta-hizkuntzari dagokionez, gaztelania izan zen gehien erabilia (% 87,22), ondoren ingelesa (% 8,81) eta euskara (% 3,97).

Datuak

Zerbitzu turistikoen alorrean, guztira 174 prestazio zenbatu ziren, eta Kurutzesantu Museoak hartu zuen zerbitzu gehien (% 87), ondoren audiogidak (% 45) eta bisita gidatuak (% 42).

Era berean, aldi honetan, martxoaren 24tik apirilaren 12ra 'Mendigozaleak bakean, gudariak gerran; gudariak bataloiak' izeneko erakusketa izan zen ikusgai Kurutzesantu Museoan, eta horrek udalerriko eskaintza kulturala indartzen lagundu zuen.

Aste Santuan egindako bisita gidatuei dagokionez, apirilaren 5ean bi ibilbide egin ziren Erdi Aroko hiribilduan zehar. Apirilaren 11n bi bisita egin ziren basilikara.

Urteen arteko bilakaerak turismo-jardueraren hazkunde positiboa erakusten du. 2025arekin alderatuta, kontsultak 34 gehitu dira, 193tik 227ra igaroz, hau da, % 17,6ko igoera. Halaber, emandako zerbitzuen kopuruak % 11,5eko handitzea izan du.

Maiatzetik irailera bitarteko bisita gidatuetarako plaza libreak

Azkenik, 2026rako bisita gidatuen urteko programazioari dagokionez, eskaera handia dagoela egiaztatu da, guztira 293 parte-hartzailek eman baitute izena eta itxaron-zerrenda dago. Hala ere, oraindik plaza libreak daude hainbat proposamenetan, eta herritarrak horietan parte hartzera gonbidatzen du Udalak.

Beharrezkoa da aurrez izena ematea eta interesdunek Durangoko Turismo Bulegoko 94 603 39 38 zenbakira deituz edo turismo@durango.eus helbidera mezua bidaliz egin dezakete.