Mar de Dios artistaren erakusketa, ikusgai Rekalde Aretoan

Mar de Dios artista barakaldarraren obra Rekalde Aretoan ikusi ahal izango da, Bizkaiko Foru Aldundiak martxan jarritako barriek programaren barruan. Artista honen ikerketaren ardatza azken bost urteotan buztina izan da, material eta lurralde kontzeptual gisa.

Erakusketak 2021 eta 2026 artean sortutako piezak batzen ditu, artistak aldi honetan bere praktikaren ardatza izan zen afektibitate terminoari erantzuteko gaitasunagatik aukeratuak. Mar de Diosen ustez afektua lan-metodo bat da, baina baita artera hurbiltzeko modu bat ere: sentiberatasunari norbera interpelatzen uzteko modu bat, gorputza lehenetsiz eta arrazionaltasuna bertan behera utziz, arrazionaltasun horrek judizio edo etiketekin esku hartu baino lehen.

Bere lanetan zeramikazko gorputzak elkarrekin nola erlazionatzen diren begiratzen du artistak: nola bermatzen diren, orekak nola negoziatzen dituzten, nola uzten duten pisua edo tentsioak sortzen dituzten. Keinu horiek, beste baten gainean pausatzen den esku batenarekin aldera daitezkeenak, afektibitatearen berezko hizkuntza aktibatzen dute, non formek elkarri eragiten dioten eta ukitzean zentzua aurkitzen duten.

Planteamendu honen barruan Mar de Diosek erakusketak Arte Ederretako Fakultatean irakasle izan zuen Angel Garraza eskultorearen Luces (2000) lana gehitzen du. Pieza elkarrizketan dauden bi elementuz osatuta dago eta erakusketan integratzen da, aintzatespenerako eta afektibitatearekin jarraitzeko keinu gisa. Bere presentziak aukera ematen du harreman-logika hori areto osora zabaltzeko, obren arteko lotura sentikorren egitura osatuz.

Erakusketak, gainera, elkarrizketa ezartzen du artistaren serie berrienarekin, gaur egun Guggenheim Bilbao Museoko Artes de la Tierra-Lurreko Arteak erakusketa kolektiboan dagoena (Manuel Cirauquik komisariatua). Mar de Diosek honakoa azaltzen du: “Denbora-kointzidentziak eta bi espazioen arteko hurbiltasun fisikoak —450 metro baino ez— aukera ematen dute lehen lanen eta berrienen arteko marra ikusezina marrazteko, eta bilakaera hori, nahiz eta bere prozesuan isila eta hautemanezina izan, denboran jarraitutasun koherente eta iraunkor gisa agertzen da orain."

Mar de Diosen ustez, kokapen bikoitz honek azken bost urteetan gertatutakoari erreparatzeko aukera ematen du: agortzen ez den interes baten iraunkortasunak eta sormen prozesu osoa zeharkatzen duen afektuak markatutako ibilbidea.

Artistari buruz

Mar de Dios (Barakaldo, 1992) Artean graduatu zen EHUn, Ikerketa-Masterra da Arte eta Sorkuntzan Madrilgo Universidad Complutensean eta Zeramika Masterra EHUn. Egin berri dituen erakusketen artean, honako hauek nabarmentzen dira: Lurreko Arteak, Guggenheim Bilbao Museoan (2025), Espejo de agua y flores, Montehermoson, Gasteiz (2025), Kore Carreras Mugica galerian (2024), Filet Space-ko erakusketa, Londresen (Natalia Suarezekin batera, 2023), Batzuk Tabakaleran,Donostian (2022), Kata Aldama Fabren, Bilbon (2021) eta Open to Art kolektiboa Milanen (2019). Milango Salone del Mobile eta ARCO (Lisboa eta Madril) azoketan parte hartu du Carreras Múgica galeriarekin.

2023an COOP argitaletxean Home, Casa, Hasiera  liburua argitaratu zuen Peio Aguirrerekin batera, Peio Aguirre, Pilar Blanco eta Estrella de Diegoren testuekin. 2025ean Bilboko Arte Eder Museoaren, Artium Museoaren eta Tabakaleraren Bilduma Partekatuak bere obra erosi zuen. Egoiliarra izan da IDPool (Vista Alegre, Portugal, 2018) eta Koganecho Artist Residency (Yokohama, Japonia, 2023) programetan.

Jardueren programa

Rekalde Aretoak hezkuntza, didaktika eta tailer jardueren programa publiko zabala eskaintzen du. Tailerrak antolatzen dira taldeentzat, irakasleentzat, ikasleentzat, familientzat eta adinekoentzat, eta baita erakusketak ikusteko bisita komentatuak ere, artistaren sormen-unibertsoan eta obraren gakoetan sakontzeko aukera ematen dutenak. Jarduera guztiak doakoak dira eta batzuk aldez aurretik izena emanda, lekua bete arte.