Astelehen honetan goizean, martxoaren 30ean, martxan jarri du Ugao-Miraballesko Udalak ibilgailu elektrikoak kargatzeko gune berri bat Arandian, mugikortasun jasangarriaren aldeko apustua aldarrikatuz.
Esan bezala, azpiegitura Arandiako aparkalekuan kokatzen da, hilerrira eta eskoletara sartzeko kalean, haurrentzako jolas-gunearen ondoan. Kokapen hori egokitzat jotzen da, bai erabiltzaileentzako irisgarritasunagatik, bai konektatzeko behar den koadro elektrikotik gertu dagoelako.
Dagoeneko, amaitutzat eman dira kargagailua instalatzeko aurretiazko obrak. Hurrengo urratsa makina bera jartzea izango da, eta maiatzean martxan hastea aurreikusten da.
Birkargatzeko puntu berria erdi-azkarra izango da, eta bi auto elektriko aldi berean kargatzeko aukera emango du. Publikoa izango da, aurrez erreserba egiteko aukerarekin, eta aplikazio mugikor zein txartel bidez aktibatu ahal izango da.
Inbertsioa
Jarduerak 14.500 euroko udal-inbertsioa suposatu du, eta Energiaren Euskal Erakundeak (EEE) finantzatu du, trantsizio energetikoa bultzatzeko politiken esparruan.
Ekaitz Mentxaka Ugaoko alkateak nabarmendu duenez, "azpiegitura berri honekin mugikortasun eredu jasangarriago eta irisgarriago baterantz urrats sendoak ematen jarraitzen dugu, herritarrei ibilgailu elektrikoen erabilera erraztuz eta gure udalerriko emisioak murrizten lagunduz".
Era berean, Udalak adierazi du Arandiakoa ez dela jarduketa bakarra izango, etorkizunean udalerriko beste eremu batzuetan ere karga-puntuen sarea handitzen jarraitzea aurreikusten baita.
