Bere zainketa-ereduaren ezarpenean aurrera doa Bizkaia

Aste honetan,Elixabete Etxanobe Bizkaiko ahaldun nagusiak Bizkaiko Foru Aldundiak oso-osorik martxan jarri berri dituen Elorrioko bizkidetza-unitate berriak bisitatu ditu. Berarekin batera Amaia Antxustegi, Gizarte Ekintzako diputatua, eta David Latxaga, Gizarte Urgazpenerako Foru Erakundeko (GUFE) gerentea, izan dira. 

Ibilbidean zehar Etxanobek azpimarratu zuenez “instalazio hauek Bizkaian zaintza eredu gizatiarragoa, hurbilagoa eta komunitarioagoa bultzatzen jarraitzeko aukera ematen digute”. “Hau da Aldundian eraikitzen ari garen bidea: aurrea hartzea zaintza sistema jasangarriagoa, pertsonalizatuagoa eta zahartzearen erronkei erantzuteko prestatuagoa eskaintzeko, gehiago bizitzeko helburuarekin, baina, batez ere, hobeto bizitzeko”, ziurtatu zuen.

GUFEren mendeko zentroa bi bizikidetza-unitate independentetan berrantolatu da: Anboto eta Eguzkilore, egoiliarrek, familiek eta langileek aukeratu dituzten izenak. Unitate bakoitzak 25 pertsonentzako edukiera du, eta guztira 50 plaza daude. Unitate bakoitzak 19 logela indibidual eta 3 bikoitz ditu, egoteko esparru bat eta terraza bat, baita esparru komunak ere, adibidez egongela bat eta komunitate-lorategi bat, etxe baten ahalik eta antzekoena den ingurunean bizikidetza errazteko eta bideratzeko diseinatuta.

Arreta integrala

Unitate hauek arreta integrala eskaintzen dute; arreta horren barruan erizaintza-zerbitzuak, terapia okupazionala, fisioterapia, psikologia eta psikiatria, gizarte-lana, sukaldaritza eta garbiketa daude. Gainera eguneroko bizitzako oinarrizko beharrak eta zerbitzu osagarriak betetzen dituzte, hala nola podologia eta ile-apainketa.

Bisitan zehar Etxanobek nabarmendu zuen proiektu hau azpiegituren hobekuntza baino askoz gehiago dela: “Gaur urrats garrantzitsua ematen ari gara Bizkaiko zainketa-ereduaren eraldaketan. Bizikidetza-unitate hauek aurrera egiteko aukeratu dugun moduaren adibide dira: baliabide modernoekin, gertukoekin eta pertsonek euren bizi-proiektua garatzen jarraitu ahal izateko pentsatutakoekin, euren etxearen ahalik eta ingurune antzekoenean”.

Elorrioko zentroaren eraldaketak 4,5 milioi euroko inbertsioa eskatu du eta pertsona ardatz duen eta Iraupen Luzeko Zainketetan Trantsizioa Sustatzeko Planarekin bat datorren ereduan aurrera egiteko foru estrategiaren barruan kokatzen da. Eredu honek unitate txikiagoen aldeko apustua egiten du, arreta hurbilagoa, pertsona bakoitzaren nortasuna eta lehentasunak errespetatzen dituena eta komunitate-ingurunera irekita dagoena bideratzeko.

Bizikidetza-unitateak, etxe baten antzekoenak

Bizikidetza-unitateak bizikidetza-talde txikiak dira, gehienez 25 pertsonakoak, eta etxe gisa funtzionatzen dute eta ingurune bero eta hurbila birsortzen dute, egoitza tradizionalen alderditik urrun. Bizkaiko Foru Aldundiak bultzatzen duen eredu honek arreta pertsonalizatua sustatzen du, pertsonarengan eta bere bizi-proiektuan zentratua, autonomia eta harreman komunitarioak erraztuz.

Legegintzaldia 2023an hasi zenetik 26 unitate berri jarri dira martxan, 513 plazarekin, Leioa, Bilbo, Barakaldo, Portugalete, Barrika eta Etxebarrin daudenak, gehi Elorrioko azken hauek. Gaur egunBizkaiak 45 bizikidetza-unitate ditu funtzionamenduan, 866 plaza guztira, lurralde osoan banatuta daudenak, gizarte-kohesioa eta familia-inguruneekiko hurbiltasuna indartzeko.

Honen moduko ekimenekin Bizkaiko Foru Aldundiak berretsi egiten du zaintza-sistema jasangarri, berritzaile eta zahartzearen erronkari erantzuteko prestatuaren aldeko konpromisoa, helburu argi batekin: “Ez da bakarrik gehiago bizitzea, hobeto bizitzea baizik”, esan zuen Ahaldun Nagusiak amaitzeko.