Arabak eta Bizkaiak indarrak batuko dituzte Gorbeiako gurutzearen oinarria konpondu eta hobetzeko
167.000 eurotik gorako inbertsio bateratua bultzatuko dute Gorbeiako gurutzearen zimendua sendotzeko eta haren ingurune naturala zaintzeko.
Gorbeiako gurutzearen zimendua konpontzeko eta hobetzeko indarrak batu dituzte aste honetan Bizkaiko eta Arabako foru aldundiek, bi erakundeen arteko kolaborazio-hitzarmenaren sinadurarekin. Horrekin, obrak hasi ahal izango dituzte.
Gorbeiako gurutzea elementu enblematikoa da, eta Gorbeiako mendiaren gailurrean dago, Kontserbazio Bereziko Eremuaren (KBE) eta Gorbeiako Parke Naturalaren barruan.
Gaur egungo gurutzea duela ehun urte baino gehiago ezarri zen, eta gailurrera jende asko joaten denez eta inguruneko klima baldintza bereziak direla-eta, higadura prozesu bat antzeman da haren oinarria ainguratuta dagoen lurrean.
Egitura Arabako eta Bizkaiko lurralde historikoen arteko administrazio banalerroan dago, eta, horregatik, elkarrekin bi foru aldundiek erabaki dute beren gain hartzea haiek mantentzeko eta kontserbatzeko behar diren obrak egingo direla ziurtatzeko jarduketak.
Helburua
Hitzarmenaren xedea da bi administrazioen arteko lankidetza bat egituratzea, zimenduak konpontzeko eta hobetzeko obrak egiteko. Bi aldundiek konpromisoa hartzen dute obrak egiten eta haien jarraipena egiten laguntzeko, obrak egiteko nahitaezko txostenak eta baimenak izapidetzen laguntzeko, eremu horretan interesa duten erakunde eta kolektiboei jarduketa zabaltzeko eta, ondoren, ingurunea garbitu, mantendu eta kontserbatzeko.
Lan honetan hiru jarduketa aurreikusten dira: obrak kontratatzea eta oinarria hobetzea, orientazio mahaia konpontzea eta elementu arkeologikoak babesteko eta kontserbatzeko jarduketen jarraipena eta ikuskapena egitea. Aurreikusten den inbertsioa 167.742,78 euro da (BEZa barne), eta % 50ean ordainduko dute bi administrazioek, hau da, 83.871,39 euro bakoitzak.