Korrikak 34 lekuko aldaketa egingo ditu Getxon

Datorren ostegunean, martxoaren 19an, Atharratzen hasiko da Korrikaren 24. edizioa. Getxon aste bat geroago sartuko da, martxoaren 26an, eta udalerria zeharkatuko du 34 lekuko aldaketekin. Aurten udalerriko 45 entitatek eta eragilek (euskara, kultur, kirol, dantza, gizarte, gazte, enpresa, abesbatza, ikastetxe, alderdi politiko, familia elkarteak….) hartuko dute parte.

AEKk antolatuta, Euskal Herri osoko erakunde askoren laguntzarekin, tartean Getxoko Udalarena, aurtengo edizioak Euskara gara lelopean, 2.175 kilometro egingo ditu, gelditu gabe eta 3.436 lekuko hartzerekin, martxoaren 19tik 29ra, Atharratzetik Bilbora. Amaia Aguirre alkateak nabarmendu duenez, “Getxoko Udalak berretsi egiten du euskararen sustapenarekin eta ikusgarritasun sozialarekin duen konpromisoa, bai eta hizkuntzaren eguneroko erabilera sustatzen duten eta bizitza publikoan euskararen presentzia indartzen duten ekimenak babestearen garrantzia ere. Era berean, Korrikan aktiboki parte hartzera animatzen ditut herritarrak, euskara bultzatzeko ahalegin kolektiboa sinbolizatzen duen ekimena baita".

Lasterketa Getxon

Lasterketa 11:00ak baino apur bat lehenago sartuko da udalerrian, Salsidu Etorbideko 65 zenbakitik, eta 11,5 kilometro egingo ditu, besteak beste, hurrengo tokietatik: Ollarretxe, Ormaza, Maidagan, Aingeru etorbidea, Bidezabal, Sarrikobaso, Algortako etorbidea, Telletxe, Salsidu, Iturgitxi, Makaleta etorbidea, Amaia, Kresaltzu, Ezekiel Agirre, Mesede, kale Nagusia eta Santa Eugenia. Romon, 2.168 aldaketan, Korrikak Irune Etxebarria Atxa getxotarra, euskaltzalea eta lehen ediziotik lasterketaren sustatzailea, omenduko du, 2025eko martxoan hil zena.