"Aurrera egin behar da, ume". Horratx Purificación gehien definitu zuen esaldietako bat, eta bere familiak ondare gisa gordetzen duen mezua. Purificación Goikoetxea Barandika emakume zuhur, kementsu eta eskuzabala zen, horiek ziren haren izaeraren zuztarrak; bere inguruan hazi zirenen bizitzan arrastoa utzi zuten ezaugarriak, eta gaur egun haren ondarearen parte gisa aitortzen direnak.
1932ko otsailaren 2an jaioa, Lemoako alaba garairako emakume aurreratua izan zen: gaztetatik ausarta, langilea eta apala, baina izaera sendo eta erabakigarrikoa. Politika, ekonomia eta futbola gustuko zituen, eta Athleticen zale sutsua zen, San Mameseko harmailetan ere ageriko egiten zuena.
Lana hartu zuen bizimodu: etengabeko ahalegina, pentsamendua eta garai berriei aurre egiteko adorea izan zituen ezaugarri. Harritzekoa zen zailtasunen aurrean altxatzeko zuen gaitasuna, baita besteei laguntzeko zuen indarra ere. Askotan zaintzaren ardura hartu izan zuen, isilean, irtenbideak bilatzen zituen eta ingurukoak ateak zabalik hartzen zituen.
Bere ibilbidean enpresari eta ekintzaile gisa ere nabarmendu zen, eta garai hartan ohikoa ez zen erabakigarritasunez eta ikuspegi argiz jarduten zuen. Kepa Amantegi enpresariarekin ezkondu ondoren, hainbat jarduera garatu zituen altzarigintzan, modan eta eraikuntzan. Durangaldean hasi zuen haren enpresa-jarduna, batik bat, eta ondoren Bilbora eta ingurura zabaldu zuen. Urteetan zehar, bere enpresek lanpostu ugari sortu zituzten, betiere ingurumenarekiko konpromisoan oinarrituta.
Gertukoek Purita, Purificación eta Puri deitzen zuten; baina, batez ere, amama: beldurren aurrean babesa, zalantzen aurrean konfiantza eta beharren aurrean, erantzuna. Purirekin bizi zutenak zorioneko sentitzen dira, hainbat “estreinako” alditan alboan izan zutelako, baita azken etapetan ere, hurbiltasunez bizitakoak. Agur esan digu, eta hutsune handia utzi. Era berean, harro eta bihotza beterik daude: ezagutu zutenek betiko altxor gisa eramango dute.
