Barakaldon jokatuko da igandean Bizkaiko Bertsolari Txapelketaren finalaurrekoen lehenengo bueltako azken saioa

Bizkaiko Bertsolari Txapelketa aurrera doa eta orain finalaurrekoen lehenengo bueltako hirugarren eta azken saioa iritsi da. Saio erabakigarria izango da, eta igande honetan jokatuko da, azaroaren 9an, Barakaldoko Lasesarre kiroldegian. Giro beroa espero da, izan ere, bertsolaritzaren zale askok jarriko dute begia saio honetan, zeinek egingo duen aurrera eta zeinek bukatuko duen txapelketako ibilbidea jakiteko irrikaz. Aurreko saioetan bezala, oraingo honetan ere irabazleak zuzenean egingo du salto finalaurrekoen bigarren bueltara, eta gainerako bertsolariek puntuazioaren arabera izango dute aurrera egiteko aukera, lehia estuan.

Bertsozale Elkarteak jakinarazi duenez, sei bertsolari izango dira oholtzan beren bertsoekin publikoaren aurrean arituko direnak: Ibai Amillategi Omaetxebarria, Irune Basagoiti Agirre, Lurdes Ondaro Mallea, Mikel Goiriena Larrazabal, Onintza Enbeita Maguregi eta Xabat Galletebeitia Abaroa. Guztiek esperientzia dute txapelketetan eta bakoitzak bere estilo berezia eta ikuspegia ekarriko du Lasesarreko oholtzara.

Gai jartzaile lanetan Idoia Anzorandia Kareaga arituko da, saioaren gidaritza eta erritmoa markatuz, eta epaimahai zabala izango du ondoan: Ainhoa Arregi Elosua, Ander Arrien Aspiazu, Garazi Mendoza Agirre, Iñaki Aurrekoetxea Arkotxa, Jurgi Fuentes Goikoetxea, Marta Ortiz Mateo eta Miriam Juaristi Urizar izango dira puntuazioaren arduradunak. Idazkari lanetan, berriz, Itxaro Juaristi Olaetxea eta Itziar Basterretxea Olarreaga ariko dira, saioaren datu guztiak jasoz eta antolakuntzaren xehetasunak zainduz.

Saioa 17.00etan hasiko da, eta sarrerak jada salgai daude bertsosarrerak.eus atarian. Saioaren egunean bertan ere, sarrera batzuk geratuko balira, Lasesarreko kiroldegiko txarteldegian eskuratu ahal izango dira, 16:30etik aurrera. Antolatzaileek animatu dute bertsozaleak garaiz hurbiltzera, saioaren hasieratik giroa eta emozioa bertatik bertara bizitzeko.