Euskadiko Farmazia Jagoleen Sareak urtebete bete du martxan jarri zenetik, eta lehen balantzean 356 sendagaien aurkako erreakzio susmagarri jakinarazi dizkio Euskal Autonomia Erkidegoko Farmakozaintza Unitateari. Eusko Jaurlaritzako Osasun Sailak azaldu duenez, emaitza horiek erakusten dute sarearen funtzionamendua positiboa dela eta farmazialarien parte-hartze aktiboak sendagaien segurtasunaren zaintza indartzen laguntzen duela.

Ekimena 2023an jarri zen abian, Osasun Sailak eta Euskadiko farmazia komunitarioek elkarlanean sustatuta. Helburua da botiken erabilerarekin lotutako kontrako erreakzioak garaiz identifikatzea, horien jarraipena egitea eta osasun-sistema publikoan farmakoen segurtasunari buruzko ezagutza hobetzea. Sistemak bereziki arreta jartzen du aurrez ezagutzen ez diren erreakzioetan eta jarraipen gehigarria behar duten sendagaietan.

Lehen urtean jasotako datuen arabera, sareak 104 kasu larri hauteman ditu (guztizkoaren %29,2), baita orain arte dokumentatu gabe zeuden 52 kasu ere (%14,8). Horrez gain, jarraipen berezia behar duten sendagaiekin lotutako 16 kasu identifikatu dira.

Guztira, 356 kasuek 610 kontrako erreakzio izan zituzten. Horietatik 233 emakumeenak izan ziren (%65,4), eta 187 kasu 65 urtetik gorako pertsonenak (%52,5). Lurraldeen arabera, 218 kasu Gipuzkoan jaso ziren, 90 Bizkaian eta 48 Araban. Erreakzioen artean nagusi izan ziren nahasmendu gastrointestinalak, nerbio-sistemako alterazioak, baita erreakzio orokorrak eta lokalak ere.

Farmakozaintza Unitateak jakinarazi du guztira 405 sendagai identifikatu direla susmagarri gisa 610 erreakzio horietan. Horien artean nabarmendu dira nerbio-sistemaren tratamendurako sendagaiak, baita sistema kardiobaskularraren eta digestiboaren zein metabolismoaren tratamenduetan erabiltzen diren botikak ere.