Sopelak Hezkuntzari lagako dizkio Abaroko lursailak
Lursail horien lagapena prozesu luzea izan da, 2024ko otsailean hasi baitzen
Eusko Jaurlaritzako Hezkuntza sailak Batxilergoko eraikin berri bat eraiki ahal izango du Sopelako Abaroko lursailetan. Joan den asteartean, uztailaren 29an, ospatutako osoko bilkuran, Udalak erabaki egin zuen Hezkuntza sailari lursail horiek behin betiko lagatzea.
Lursail horien lagapena prozesu luzea izan da. 2024ko otsailean hasi zen, Sopelako Udalak lurrak zuzenean okupatu zituenean, haien jabeekin okupazio aktak sinatu ostean. 2025eko martxoan, Sopelako Udalbatzak asmoen adierazpen bat onartu zuen, lagapena ahalik eta epe laburrenean gauzatzeko konpromisoa hartuz. Azken hilabeteetan, beharrezko izapideak egin dira Jabetza Erregistroan, eta atzoko Osoko Bilkuran, lursailen behin betiko lagapena onartu zen.
Bestalde, Loroñoko lursaila Hezkuntza Sailari lagatzea 2025eko urtarrilaren 30eko Osoko Bilkuran onartu zen. Aurrez, Udalak barneko izapideak egin zituen; besteak beste, Loroñoko lur horri hezkuntza-erabilera emateko Sopelako hirigintza-araudia aldatu zuen.
Bi lagapen horiek onartu ostean, Eusko Jaurlaritzako Hezkuntza Sailak beharrezko lurzoruak ditu jada bi eraikin berri eraikitzeko: batetik, Haur Hezkuntzako (HH) ikastetxe berria Loroñon —2 eta 5 urte bitarteko haurrak hartuko dituena; egungo Zipiriñe HLHIk Lehen Hezkuntzako eskaintzari eutsiko dio—; eta, bestetik, Batxilergoko ikasketak hartuko dituen eraikin berria Abaroko eremuan, egungo IES Sopela BHIren ondoan. Azpiegitura berri horiek eta ikastetxe bakoitzari esleitutako hezkuntza-etapak Eusko Jaurlaritzak, Sopelako Udalak eta Zipiriñeko zein Iberreko guraso elkarteek (AMPAk) elkarrekin adostu zituzten 2024ko apirilean.
“Eusko Jaurlaritzarekin elkarlanean jarraituko dugu Sopelan kalitatezko hezkuntza eskaintza publiko bat bermatzeko, eta Zipiriñe eta Iberrek azken urteetan izan dituzten espazio-arazoak atzean uzteko. Horrela, Sopelako hezkuntza-komunitatearen eta udal ordezkaritza duten talde politiko gehienen aldarrikapen historiko bati erantzungo diogu”, adierazi du Guruzne Carrasson Sopelako alkateak.