Aste honetan jarri du martxan Mungiako Udala 2025eko aurrekontu parte-hartzaileen esparruan aukeratutako "fatxadak mural artistikoen bidez edertzeko" ekimena. Horren baitan, bi herriko memoria kolekiboa omentzen duten bi mural margotuko dira bi gune estrategikoetan.
Alaitz Erkoreka Mungiako alkateak adierazi duenez: "mural hauekin gure historiari omenaldia egin nahi diogu, baita egunerokotasunetik, kulturatik, ahaleginetik eta sustraitzetik eraikitzen lagundu dutenei ere. Gure kaleak edertzeko eta herritarrek espazio publikoarekin eta memoria kolektiboarekin duten lotura indartzeko modu bat ere bada".
Lehenengoa Aita Arrupe kalean margotzen ari dira, eta bendejerei eskainita dago, mendeetan herriko plazara baratzetan landatutako produktuak saltzera joan ziren landa-eremuko emakumeei. Irudi historiko horrek agerian uzten du emakume horiek jakintza-igorle, familia-ekonomiaren sostengatzaile eta komunitate-sortzaile gisa duten funtsezko zeregina. Horma-irudiak, gainera, azalpen-testu bat izango du, euskaraz eta gaztelaniaz, ondarea testuinguruan kokatzeko.
Bigarren murala Lauaxeta Olerkari kalean egiten ari dira eta Lauaxeta irudikatzen du, Estepan Urkiaga poeta eta kazetariaren ezizena. 1905ean jaio zen, eta Mungiari oso lotuta dago. Lauaxeta XX. mendeko euskal literaturako pertsonaia nabarmenetako bat da. Horma-irudi horren helburua ez da soilik haren figura eta ondare kulturala omentzea, baizik eta haren memoria belaunaldi berriei hurbiltzea ere.
Jarduera honekin, Mungiako Udalak berretsi egiten du hiri-artearen aldeko apustua, gizarte-eraldaketarako, aintzatespen historikorako eta hiri-ingurunea hobetzeko tresna gisa. Horma-irudi horiek udalerriaren iraganaren eta orainaren arteko topagune berri bat izango dira, historia zaindu eta etorkizunera proiektatzen duten herritarren isla.
