Aurreko edizioek izandako emaitza bikainak kontuan izanda, Bizkaiko Foru Aldundiak martxan jarri du Anezka enplegu-anezken programaren edizio berri bati astearte honetan goizean. Anezka Bilbon abiarazitako ekimen hau Dema Enplegu eta Ekintzailetzako Foru Agentziarekin elkarlanean jartzen da martxan.
Ekitaldian, networking topaketa bat egin dute parte-hartzaileek eta Bizkaiko enpresa-sareko ordezkariek. Era horretan, indartu egin da talentuaren eta benetako lan-aukeren arteko harreman zuzena.
67. Anezkaren abioa bat dator Demak bultzatutako beste programa batzuen emaitzen kontsolidazioarekin. Esate baterako, Emalan +45 programak, zeina zuzenduta dagoen kualifikazio handiko 45 urtetik gorako emakumeei, 114 parte-hartzaileri lagun egin die 2022an abiatu zenetik, eta % 67ko laneratze-tasa lortu du.
Orain aribidean den 67. anezka honek 9 laneratze erregistratu ditu dagoeneko. Berriki amaitutako Ezkerraldea 18 eta Eskuinaldea 8 enplegu-anezkek lortu dituzten 24 kontratazioak 9 horiei gehituz gero, 33 kontratazio egin dira programaren azken hiru edizioei lotuta.
Hasierako ekitaldian, Teresa Laespadak, Enplegua, Gizarte Inklusioa eta Berdintasuna Sustatzeko foru diputatuak programa horien ibilbidea eta kontsolidazioa balioetsi ditu: "ANEZKA programako anezkak enplegua bilatzeko tresna bat baino askoz gehiago dira. Eraldaketa pertsonala, erresilientzia eta eraikuntza kolektiboa lantzeko guneak dira. Eta gauza bera EMALAN +45 programari dagokionez, sentsibilitatez eta zorroztasunez laguntzen baitie euren ibilbidea berraktibatzeko beharra duten emakume kualifikatuei. Bizkaiak guztion talentua behar du, eta programa horiek aktibazio eta kohesio sozialaren benetako erakusgarri dira".
Arestian onetsitako 2024-2029 aldiko Foru Enplegu Plan berriarekin lotu du Laespadak ekitaldia, eta hau azpimarratu du: "Gure erronka da aurrea hartzea lan-merkatua dagoeneko eraldatzen ari diren trantsizioei: digitala, berdea eta demografikoa. Plan berriak kalitatezko enplegua du ardatz nagusitzat, gure lurraldearen beharrizan errealetara egokitutako neurriak ezartzeari begira, bereziki behar handiena dutenengana orientatuta".
2016an abian jarri zenetik, Anezka programak 67 anezka gauzatu ditu Bizkaian, 1.149 parte-hartzailerekin; horietatik, 719 sartu dira lan-merkatuan, hau da, % 62,58ko laneratze-tasa egon da. Pandemian zehar online gauzatutako Anezka Prest programaren bost edizioak (2020-2021) kontuan hartuta, honako balantze hau dugu: 1.227 pertsona artatuta eta 753 laneratze. % 61,37ko tasa globala, beraz.
Anezka programa Bizkaiko lurralde osoan inplementatu da: 25 anezka Bilbon, 19 Ezkerraldean, 9 Uribe Kostan eta Eskuinaldean, 3 Nerbioi-Ibaizabalen, 2 Durangaldean, 2 Meatzaldean, 1 Busturialdean, 1 Enkarterrin eta 6 online formatuan. Anezka bakoitzak 20 pertsona inguru biltzen ditu lau hilabetez, teknikari espezializatuen koordinaziopean. Parte-hartzaileek funtsezko konpetentziak lantzen dituzte, hala nola marka pertsonala, autokonfiantza, talde-lana, lan-elkarrizketak, ekintzailetza eta konpetentzia digitalak. Enplegu-foroetan eta anezken arteko ekitaldietan ere hartzen dute parte, eta berariazko ibilbide bat dago euren proiektu profesionala hasi nahi dutenentzat.
Emalan +45ek, esaterako, ikuspegi orobat praktikoa eta indibidualizatua du, eta kualifikazio handiko 45 urtetik gorako emakumeak ditu ardatz, hain zuzen ere zuzendaritzako edo teknikarien arloko esperientzia izanik lan-merkatura itzultzeko oztopoak dituztenak. Bere lau edizioetan, EMALANek emakumeei lagun egin die euren askotariko sektoreetan: telekomunikazioak, marketina, giza baliabideak, abokatutza, ingeniaritza eta proiektuen kudeaketa, besteak beste.
Bai laneratze-kopuruan eta bai enpleguaren kalitatean islatzen da bi programen inpaktua. Kontratua erregistratu den 483 kasuetan, % 59 aldi baterakoak izan ziren, % 27,7 mugagabeak, % 11,8 norbere konturakoak eta % 1,5 praktiketakoak. 2022ko lan-erreformatik, kontratu mugagabeen ehunekoa nabarmen handitu da, eta % 44,65era iritsi, aurreko % 13,1en aldean.
Anezka eta Emalan +45, gainera, ikuspegi inklusiboagatik nabarmentzen dira. Parte-hartzaileen % 66 emakumeak izan dira, eta bi programek arreta berezia ematen diete iraupen luzeko langabeei, 45 urtetik gorakoei, esperientziarik gabeko gazteei, migratzaileei eta desgaitasuna duten pertsonei.
67. Anezka martxan eta Emalan +45 indartuta, bi programok politika publiko kontrastatu eta eraginkor gisa berresten dira, eta 2024-2029 aldiko Foru Enplegu Plan berriaren ikuspegiarekin lerrokatuta. Hala, Bizkaiko Foru Aldundiak lurralde osoan eusten dio kalitatezko enpleguarekin, aukera-berdintasunarekin eta gizarte-kohesioarekin duen konpromisoari.
