Doako Bermibusa abiarazteko lehen pausua eman du Udalak

EH Bilduren eta Guzanen aldeko botoek argi berdea eman diote asteazken honetan ospatutako ez ohiko osoko bilkuran Bermibusa arautzen duen ordenantza fiskala baliogabetzeari, zerbitzua doan eskaintzeko helburuarekin, EAJ-ren aurkako botoari aurre eginez.

Neurri honek udalerriko garraio-eredua eraldatzeko norabidean aurrerapauso garrantzitsua suposatzen du, bai ikuspegi sozialetik, bai ingurumenaren ikuspegitik.

Udalak argi adierazi du bizi-kalitatea hobetzea dela neurri honen oinarria. Irisgarritasuna eta jasangarritasuna izan dira erabakia hartzeko funtsezko irizpideak, eta helburua da herritar guztiek, egoera ekonomikoa edozein dela ere, garraio publikoa erabili ahal izatea. Udalaren ustez, ezinbestekoa da trantsizio ekologikorako urrats zehatzak ematea, eta Bermibusa doan eskaintzeak, gainera, herrigunetik autoaren erabilera murrizteko eta mugikortasun iraunkorra sustatzeko bidea emango du. Horrez gain, herritarren kontzientzia piztea ere nahi du Udalak, herriko mugikortasunean ohiturak aldatuz eta garraio publikoaren erabilera lehenetsiz.

Administrazio-prozesuei dagokienez, ordenantza fiskalaren baliogabetzea behin-behinekoa da oraingoz, eta hurrengo 30 egun baliodunetan jendaurrean egongo da. Epe horretan erreklamaziorik aurkezten ez bada, ordenantza automatikoki baliogabetzat joko da behin betiko. Prozesu hau amaitu ondoren, Udalak Bermibusaren zerbitzua arautzeko ordenantza berri bat landuko du, zerbitzuaren funtzionamendua eta erabilera-baldintzak zehazteko. Udalaren asmoa da udarako zerbitzu hau doan eskaintzen hastea.