Bizkaibuseko flotaren elektrifikazioan aurrera egingo du Aldundiak
Bizkaiko Foru Aldundiak Bizkaibuseko flotaren elektrifikazioan aurrera egingo du datozen lau urteetan, eta horretarako "inbertsio handia" egingo du Aparkabisan. Horrela iragarri du gaur goizean Garraioak, Mugikortasuna eta Turismoa sustatzeko foru-diputatu Sonia Pérezek Bizkaiko Batzar Nagusietan. "Sail honen helburua mugikortasun eta turismo jasangarrirantz aurrera egitea da, eta kalitatezko garraio publikoaren sistema etengabe hobetzea, Bizkaiko herritarrak harro senti daitezen", adierazi du.
Garraioari dagokionez, foru diputatuak iragarri du 2024an "inbertsio handia" egingo dela Aparkabisako instalazioak elektrifikatzeko, eta horri esker, aukera egongo dela Bizkaibuseko flotak autobus elektriko berriak erabiltzen jarraitzeko. "Propultsio elektrikoa kontuan hartu beharreko alternatiba da, ibilgailu horiek kargatzea ahalbidetuko duten instalazio finkoetan inbertitzea eskatzen duena".
Gaur egun hiriarteko autobus-lineek 6 ibilgailu elektriko eta 79 hibrido dituzte, flotaren % 25. Gainerakoek Europako jarraibide zorrotzenak betetzen dituzte ingurumenaren arloan. Datozen urteetan, zero emisioko ibilgailu gehiago jartzen jarraituko dugu, Bizkaibusen karbono-aztarna murrizten laguntzeko.
Legegintzaldi honetan jorratu beharreko beste zereginetako bat sailaren eskumeneko eremu guztietan garraioen sektorea digitalizatzea da.
Bizkaibus zerbitzurako lantzean behingo txartela banku-txartelaren bidez ordaintzeko aukera foru-autobus guztietara zabaltzeko lan egitea proposatzen da, joan den ekainetik Bilbo Intermodalaren eta Aireportuaren arteko ibilbidea egiten duen linean gertatzen den bezala.
Halaber Zerbitzuaren markesinetan eta zutoinetan informazio-terminalak garatzea, eguzki-energiaz elikatuta, autobusaren iritsiera-denborei edo erabiltzaileentzat interesgarria den beste edozein daturi buruzko informazioa era jasangarrian emateko. Hobetu egingo dira Bizkaibusen markesina berriak, herritarrek eskatutako zerbitzuak ezarriz, hala nola kortesiazko USB kargatzaileak edo bezeroen arretarako zerbitzura deitzeko interfonoak.
Digitalizazioak beste erronka batzuk planteatzen ditu, hala nola beste administrazio batzuekin batera proiektuak garatzea, eta horien artean aipa daiteke "Garraioko Datu Aurreratuak Sortzeko Proiektua", Bizkaibusen Google Transfer Files (GTF) artxiboak garatzeko eta etengabe eguneratzeko, Eusko Jaurlaritzako Garraio Sailarekin koordinatuta.
Salgaien errepideko garraioa
Errepideko garraioaren arloko eskumenei dagokienez sektorearen digitalizazioaren ardatza hasitako lanei jarraipena ematea izango da, ondore horretarako horien operatiban Garraio, Mugikortasun eta Hiri Agendako Ministerioaren (MITMA) egoitza elektronikoko prozesuak txertatuz eta garraiolarien eskura jarriz.
Tarifa-sistema integratu berria
Sonia Pérezek Bizkaiko Mugikortasunaren Agintaritzari (BMA) buruz ere hitz egin du, eta adierazi du bere lana "sustatu" egingo dela Bizkaian garraio publikoaren arloan eskumena duten administrazioen arteko partaidetza- eta lankidetza-mekanismoak artikulatzeaz arduratuko den erakundea izan dadin.
Esparru horren barruan Bizkaiko tarifa-mapa bost eremutik hirura murrizteko lan egitea proposatzen da, lurraldeko garraio publikoko operadoreen tarifak parekatuz eta transbordoen ordainketa kenduz. "Horrela, multimodalitatea txertatu nahi da bidaia-estrategietan, eraginkorragoak eta iraunkorragoak izan daitezen".
"Azken batean, Lurralde Historiko osoan kalitate-estandarrak (maiztasunak, plazen eskaintza, etab.) betetzen direla bermatuko duen garraio-eredua ezartzea da kontua", nabarmendu du azkenik.
Bi BiziPark berri Berangon eta Trapagaranen
Mugikortasunaren arloan, "Bizipark, Bizkaibizi eta Bizipuntuak hiru proiektu estrategikoen hedapenean eta sendotzean" oinarrituko dira zereginak. Proiektu horiek "aurreko legegintzaldian jarri ziren abian bizikletaren erabilera sustatzeko eta errazteko, erakundeen artean lankidetzaren barruan udalekin batera arituta", aurreratu du Sonia Pérezek.
Ildo horretatik besteak beste honako hauek iragarri ditu: urrian BizkaiBizi zerbitzua martxan jartzea; dagoeneko 110 elementu dituen Bizipuntuen sarea etengabe hobetzea; eta bizikletentzako bi aparkaleku seguru berri sartzea BiziPark sarean, Berangon eta Trapagaranen. Aparkaleku hauek Ermua, Derio, Barakaldo, Gueñes, Abadiño, Bermeo, Zalla eta Portugaleteko udalekin hitzartutako 8 aparkalekuei gehituko zaizkie.
Mugikortasun Iraunkorreko Planak
Berrikuntza garrantzitsu gisa sailak dirulaguntzen programa bat sortuko du 5.000 biztanletik gorako udalei Hiri-Mugikortasun Iraunkorreko Planak ezartzen laguntzeko, eta beste programa bat Bizkaiko enpresei euren Mugikortasun Planak garatzen laguntzeko. Azken neurri honen bidez lurraldean finkatutako enpresetako langileen artean mugikortasun aktiboko moduen erabilera sustatu nahi da, baita ibilgailu partikularraren erabilera murriztu ere.
Bide berdeak
Bide Berdeen kudeaketa da legegintzaldi honetan Garraioak, Mugikortasuna eta Turismoa Sustatzeko Sailaren esku garatuko den beste berrikuntzetako bat. Ildo horretan foru arduradunak iragarri du Bide Berdeen Lurraldearen Arloko Plana idatziko dela; planak lurzorua kudeatzeko lanei ekiteko eta jarduketak planifikatzeko oinarrizko tresna gisa balioko du. Hori errealitate bihurtu arte "euren udalerrietan bide eta ibilbide berdeak kudeatu eta egokitu edo bide publikoen katalogoak egin nahi dituzten udal eta mankomunitateentzako laguntza-programa batean" lan egitea da asmoa.
Gogorarazi duenez "gaur egun Lezamako Trenbide Zaharra eraikitzeko lurzoruaren kudeaketan ari dira lanean, Nekazaritza, Arrantza eta Elikadura Ministerioari dagokiona. Obrak amaitutakoan Mugikortasuna Sustatzeko Zuzendaritzak bere gain hartuko du azpiegitura berri hori mantentzeko ardura".
Turismoa, goranzko bidean dagoen sektorea
Turismoari dagokionez, Sonia Pérezek pandemia aurreko zifrak berreskuratu dituen sektoreak uda honetan lortutako datu onak azpimarratu ditu, eta gogorarazi du, Eustaten datuen arabera, 584.332 sarrera izan direla guztira. Beraz, horrek esan nahi du 2022an baino ia 23.000 sarrera gehiago eta 2019an baino 85.601 gehiago izan direla.
Hazkunde hori enpleguan ere islatzen da. Hoteletan, landa-ostatuetan eta apartamentu turistikoetan okupatutako langileen datua positiboa da berriro, 2.394 langilerekin, hau da, % 2,3ko hazkundea 2019. urtearekin alderatuta.
Aldagai horiekin batera diputatuak gogorarazi du okupazio maila eta batez besteko egonaldia oso egonkorrak izan direla 2019. urtearekin alderatuta: % 66,5eko okupazioa eta batez besteko egonaldia 2,07 gauekoa. "Gure helburua batez besteko egonaldi hori haztea lortzea da, eta, horretarako, turismoa sustatzeko eta sektoreari laguntzeko lanean jarraituko dugu, gobernantza eta behatokia funtsezko ardatz gisa hartuta", adierazi du. Sustapen hori udalerriekin, eskualdeekin, eskualde-garapeneko erakundeekin eta lehentasunezko jarduera-eremuekin batera egingo da.
Sailaren lehentasunetako bat, zehatz esanda, barne-turismoa garatzen jarraitzea eta landa-turismoa, kalitatezko turismo iraunkorra, sustatzea da. "Oso azpimarragarria da barne-turismoaren garrantzia, Andaluzia eta Galizia bezalako autonomia-erkidegoekin batera bisitari gehien sortzen dituena baita, eta % 21eko hazkundea izan du 2019. urtearekin alderatuta".
Kanpo-sustapeneko kanpainak
Sonia Pérezek, era berean, arreta jarri du nazioarteko turismoaren sustapenean eta datu moduan eman du gehien hazi diren herrialdeak Belgika, Portugal eta Frantzia izan direla, eta aldi berean herrialde indartsuak direla AEB, Txina eta Japonia.
Helburu horrekin iragarri du datorren astelehenean, urriaren 9an, nazioarteko turismo-kanpaina jarriko dela abian, sare sozialetan finkatuko dena, eta Paris, Milan eta Amsterdam izango dituela ardatz, Bilbora zuzeneko hegaldiak dituzten hiriak baitira.
"Ondorioz, sektoreak bizi duen susperraldi berrian Bilbao Bizkaia 2030 Turismo Estrategia garatzen jarraituko dugu Turismo Bilbaorekin, sektorearen gobernantza gidatuz, Bizkaiko lurralde osoaren sustapenean arreta berezia jarriz, eta Eusko Jaurlaritzarekiko koordinazioan jasangarritasuna lantzeko, Garraio eta Mugikortasun Zuzendaritzarekiko zeharkakotasuna ahalbidetzeko".