Bilboko Udalak haurrentzako jolasgune berri bat eraikiko du Otxarkoagan

Bilboko Udalak398.161,47 euroko aurrekontua bideratuko du Otxarkoaga auzoko Ugarteko ezpondan haurrentzako jolasgune berri bat eraikitzeko. Lanak bihar hasiko dira, uztailaren 1ean, eta lau hilabetez luzatuko dira.

Proiektua Auzokide Planaren barruan dago, eta, beraz, 3. barrutiko auzotarrek eta gizarte-eragileek lehenetsi dute. Gainera, hiriko auzoetako espazio publikoak hobetzen jarraitzeko eta gaur egun gutxiegi erabiltzen diren eremuei balioa emateko udal-konpromisoari erantzuten dio, erabilera berriak emanez, aire zabaleko jarduera, haur-jolasa eta auzo-bizikidetza sustatzeko.

Esku-hartzeak bi jolasgune sortzea aurreikusten du. Lehenengoa ezpondan bertan kokatuko da, lurraren malda naturala aprobetxatuz paisaian integratutako elementu ludikoak instalatzeko. Bigarrena kota baxuagoko plataforma berri batean kokatuko da, haurrek eta haien zaintzaileek gozatzeko espazio irisgarri eta segurua sortuz.

Ingurunearen topografiara egokitutako espazioa

Obrek lur-mugimenduak eta plataforma berrien eraketa barne hartzen dituzte, lursaila aurreikusitako erabileretara egokitzeko. Era berean, eskailera eta sarbide berriak egingo dira, eremuko koten arteko konektagarritasuna hobetzeko eta espazioaren irisgarritasuna errazteko.

Jarduketak ezpondak profilatzea eta landareztatzea ere aurreikusten du, multzoaren paisaia-integrazioa hobetzeko eta ingurunearen izaera berdea indartzeko.

Ezpondan integratutako jolasak eta haurren eremu inklusiboa

Mendi-hegaleko jolasgunean, nagusiki zur naturalez egindako hainbat elementu egongo dira, hala nola plataformak, enborrezko zubiak, eskalatzeko sareak eta txirrista handi bat, dagoen malda aprobetxatuko duen ibilbide ludiko bat eratuz.

Plataforma berriak beste haur-eremu bat izango du. Barruan, zabuak (haietako bat inklusiboa), kulunkak, malguki-jolasak, karrusel bat eta egitura multifuntzional tematizatu bat, igotzeko, irristatzeko eta jolas sinbolikoko jarduerak egiteko aukera emango duena.

Jolasgune guztiek segurtasuneko zoladura jarraitua izango dute, erabilera- eta babes-baldintza egokiak bermatzeko.

Esku-hartzea osatzeko, bost banku jarriko dira (haietako bi estaliak), iturri berri bat eta hainbat babes-elementu, hala nola zurezko hesiak eta barandak, beharrezkoak diren eremuetan.

Era berean, argiztapen-sistema berri bat jarriko da eremuan, jolasguneetarako argi bereziekin.