'Kultura eta Pentsamendua' zikloaren jardunaldi berri bat jasoko du bihar Bidebarrieta Kulturguneak

Astelehen honetan, maiatzaren 11n, Imanol Zuberok 'Demokrazia higatuak: desberdintasuna eta noraeza autoritarioa' izeneko hitzaldiarekin emango dio jarraipena maiatzaren 4an hasi zen 'Kultura eta Pentsamendua' zikloari. Patxi Lanceros, Filosofian doktorea, da Bidebarrieta Kulturguneak jasotako topaketak aurkezteko arduraduna, eta bertan fenomeno hau ikuspuntu ezberdinetatik jorratuko da. Topaketa guztiak sarrera librekoak dira, eta 19:00etan hasiko dira.

Badirudi demokraziak bere erakargarritasuna galdu duela, ustelkeria-eskandaluek, erakundeen higadurak, polarizazio politikoak, herritarren mesfidantzak eta zuzenbide-estatuaren ahultzean bat egiten duten beste faktore batzuek bultzatuta. Aitzitik, sistema politikoen kalitate demokratikoa galtzeak erraztu egiten du faxismoa mehatxu gisa ez, baizik eta gero eta bideragarriagoa den aukera gisa aurkeztea.

Bizitza publikoaren hutsaltzea, desberdintasunaren gaitza, gorroto-mezuak edo etikoki zalantzazkoak diren gerra-gatazken ugaritzea zurrunbilo handiagoak iragartzen dituen noraezaren zantzu kezkagarriak dira. Horren aurrean, badirudi demokraziak amore eman duela diskurtso autoritarioen berpiztearen aurrean, eta horrek herritarren erantzukizuna eskatzen du erantzun informatu, irmo eta zintzo bat garatu ahal izateko.

Jardunaldi horietan, ospe handiko lau ikertzaile aurkeztuko dira, fenomeno horren arrazoiak eta dinamikak argitzen ahaleginduko direnak, erantzun konplexu eta iraunkorrak lantzeko, balio demokratikoak babesteko eta oinarrizko eskubide eta askatasunetan atzerakadak saihesteko.

'Orainaldi honen iluntasun espezifikoari buruz'

Maiatzak 4, astelehena, 19:00etan

Manuel Cruz Bartzelonako Unibertsitateko Filosofia irakaslea da, eta, gainera, politika-lanetan aritu zen, Senatuko presidente izan baitzen 2019ko maiatzetik abendura bitartean, eta 220tik Autonomia Erkidegoetako Batzorde Orokorreko presidentea da. Bere ibilbidean historiaren filosofiari eta filosofia politikoari buruzko lanak nabarmentzen dira, eta 2005eko Anagrama Saiakera Saria ("Las malas pasada del pasado"), 2010eko Espasa Saiakera Saria ("Amo, luego existo"), 2012ko Jovellanos Nazioarteko Saiakera Saria ("Adiós, historia, adiós") eta 2016ko Miguel de Unamuno Saiakera Saria ("La flecha (sin blanco) de la historia") irabazi ditu. El País, El Confidencial, La Vanguardia, Infolibre, Catalunya Ràdio eta SER kateko ohiko kolaboratzailea ere bada.

'Demokrazia higatuak: desberdintasuna eta noraeza autoritarioa'

Maiatzak 11, astelehena, 19:00etan

Imanol Zubero Soziologian doktorea eta EHUko irakaslea da. Sindikalismoari eta aldaketa teknologikoari, informazioaren teknologia berriei, gizarte-mugimenduei, boluntariotzari, indarkeriari eta politikari buruzko artikulu ugari eta dozena bat liburu idatzi ditu. Gainera, hainbat ekimen eta gizarte-erakundetan parte hartu du, antimilitarismoaren, bakezaletasunaren eta herritarren mugimenduaren esparruan. Bakearen Aldeko Koordinakundearen sustatzaileetako bat izan zen.

'Faszismo berrien kontrairaultza prebentiboa'

Maiatzak 18, astelehena, 19:00etan

Nantu Arroyo Filosofian doktorea da Madrilgo Unibertsitate Autonomoan, Historiaren Filosofia: Demokrazia eta Mundu Ordena Masterrean (UAM) eta Filosofian lizentziaduna Madrilgo Unibertsitate Konplutentsean. Bere ikerketa-ildoak filosofiaren eta ideia politikoen historia, filosofia politikoa eta kulturarena eta ikasketa foucaultiarrak dira. Pentsamendu Garaikidearen Genealogiak (Genneo) ikerketa taldeko kidea da eta Europako Failure: Reversing the Genealogies of Unsuccess, 16th-19th Centuries (H2020-MSCA-RISE) proiektuko kidea. Gaur egun, Historiaren Filosofia: Demokrazia eta Munduko Ordena Masterraren kalitate-arduraduna da.

'Krisi garaia, denboraren krisia: azelerazioa eta joera autoritarioak'

Maiatzak 25, astelehena, 19:00etan

Ariadna Álvarez Gavela doktorea da Madrilgo Unibertsitate Konplutentsean eta Filosofia irakaslea Salamancako Unibertsitatean. Valladolideko Unibertsitateko irakasle elkartua izan da, ikertzaile bisitaria Université Bordeaux III Montaignen (Frantzia) eta ikertzaile laguntzailea José Ortega y Gasset Ikerketa Unibertsitate Institutuan. Madrilgo Unibertsitate Konplutentseko eta Salamancako Unibertsitateko hainbat proiektu eta ikerketa-taldetan ere kolaboratzen du, eta ReOTi (Rethinking the Orther of Time - Goethe Universität Frankfurt & UCM) doktoratu ondoko sareko core group member da. Bere interes akademiko nagusien artean oroimen kolektiboa, iraganaren idazketa eta filosofiaren eta literaturaren arteko harremana daude.