Unamuno plazako iturria zaharberrituko du Udalak

Bilboko Udalak 35.000 euro inguruko aurrekontua bideratuko du Zazpikaleetako Unamuno plazako iturria zaharberritzeko. Lanak asteazken honetan goizean hasi dira, apirilaren 22an, eta bost aste inguru iraungo dute, eguraldiaren arabera. Lan horien helburuak iturriaren kontserbazioa bermatzea eta hiriaren ondarearen elementu berezi honen balioa nabarmentzea dira.

Iturria 1984an jarri zen, plaza birmoldatu zenean. Ramón Lecea udal-arkitektoak diseinatu zuen. Inspirazio grekozko estetika du. Lau elementuei (sua, lurra, ura eta airea) eskainitako lau tutuz eta piletaz osatuta dago, eta metalezko piezak eta marmol zurizko elementuak konbinatzen ditu.

Denborak eta eguraldiak eragindako kalteez gain, otsailean eraso bandaliko bat jasan zuen monumentuak. Horregatik, beharrezkoa da orain hasi den esku-hartzea. 

Lehengoratzeko jarduketa integrala

Jarduketan, lehenik eta behin, gainazal metalikoak garbituko dira eta pintura erantsiak kenduko dira, betiere jatorrizko patina errespetatuz. Era berean, babes-tratamenduak aplikatuko dira.

Marmolezko elementuei dagokienez, zikinkeria kontu handiz garbituko da, margo-geruzak kenduko dira, eta materiala produktu hidrofugoak aplikatuz finkatuko da. Gainera, bolumenak berregiteko lanak egingo dira, erretxina berezien bidez, eta piezak birjarriko dira, mota eta kolore bereko marmolarekin.

Proiektuaren barruan sartzen da, halaber, bandalismoak eragindako kalteak konpontzea, desagertutako marmolezko plaka birjarriz, tutuaren elementu metaliko apaingarria birsortuz, eta piletaren eta zutabearen kaltetutako zatiak birjarriz.

Era berean, jatorrian tutuen gainean zegoen kratera edo ontzia birjarriko da. Gaur egun, krateraren oinarria baino ez da kontserbatzen, elementua iturria inauguratu eta gutxira lapurtu zutelako. Pieza berritzeko, iturria udal artxiboetan eraikitzeko espedientea eta Ramón de Lecea arkitektoak berak diseinatutako dekorazio-elementuen zirriborroak bilatu dira, lapurtutako elementua jatorrizkoarekiko ahalik eta fidelen izan dadin.

Lanak egiteko, aldamio txiki bat jarri beharko da, eta jarduketa-eremua mugatu, herritarren segurtasuna une oro bermatuz.