La Perrerak 'KSIaK+AA' ikus-entzunezko bi erakusketa jasoko ditu

Astelehen honetan, arratsaldeko 19:00etatik aurrera, Konekta Ideiak programaren esparruan hautatutako 'Vigilantes de la Perrera' eta '¿Nǐ Chī Le Ma/Has comido ya?' izeneko ikus-entzunezko erakusketen inaugurazioa jasoko du La Perrera eraikinak, Bilboko Udalak antolatuta.18 eta 35 urte bitarteko gazteei zuzenduta dago.

Bilboko Udalak esperientzia teorikoa eta praktikoa eskaintzen die hautatutako pertsonei, KSIen esparruan beren sormen-potentziala aktibatzeko, gazteek hiriko kultura- eta sormen-bizitzan parte har dezaten sustatuz, beren ekimenetatik abiatuta. Proiektu horien komisariotza Miren Lauzirika Art for Life sorkuntzaren arloko aholkularitza-enpresakoak egin du. Artistei lagundu die prozesu osoan zehar, sektoreko profesionalen prestakuntza eta aholkularitza jaso duten bitartean.

Erakusketa hauek aukera ematen dute artista hasiberri biren lana ezagutzeko: María Gracia Cebrecos Loayza eta Xingyi Lin Chen. Artista horiek sorkuntza- eta ikerketa-prozesu bat garatu dute memoriari  ikusgarritasuna ematen eta ikusezina dena balioesten laguntzen duten gaien inguruan. Bi kasuetan, adimen artifizialaren erabilera zeharkako baliabide gisa planteatzen da, betiere mezu artistikoaren zerbitzura.

Artistei buruz

Xingyi Lin Chen-ek, artista eta komunikatzaile bisuala den aldetik, '¿Nǐ Chī Le Ma/¿Has comido ya?' proposamena aurkeztu du. Horren bidez, Euskal Autonomia Erkidegoko diaspora txinatarraren memoria kolektiboa aztertzen du, ikuspegi intimo eta afektibo batetik. Bere lana zaintzaren eta hitzik gabeko maitasunaren lengoaietan sartzen da, eta arreta janarian jartzen du, lotura eta transmisio kulturalerako modu gisa. Lan hau artxibo emozional bat da, Bizkaian bizi diren Txinako belaunaldi desberdinak lotzen dituena: 90eko hamarkadan emigratu zutenak zein bi kulturen artean hazi diren gazteak, baita adoptatuak ere, beren ondare kulturala hainbat modutan bizi dutenak. Emaitzak erakusten du egunerokoa memoria partekatuko espazio bihur daitekeela.

María Gracia Cebrecos Loayza artistak eta arkitektoak 'Vigilantes de la Perrera' aurkeztu du, gaur egun La Perrera (Sabino Arana 50-Basurtu) eraikina den horretan dauden memorien ikerketan oinarritutako in-situ esku-hartzea. Haren lana 1921etik aurrerako dokumentu-artxibo zabal batean oinarritzen da, udal-eraikin horrek izan dituen erabilera ugariak eta konfigurazio arkitektoniko desberdinak kontuan hartuta, besteak beste, gai sukoien biltegia, erraldoien eta buruhandien biltegia eta txakurtegia izan baita. Proposamenaren arabera, espazio hori euskarri bat da, non iraganeko geruzak ikusi egiten diren orainean, lekuari lotutako pertsonaiak, objektuak eta materialak birkonfiguratzen dituen begirada espekulatibo batetik.

Bi artistek bisitaldi komentatuak egingo dituzte apirilaren 15ean eta 17an, 19:00etan, beren sormen-prozesua zuzenean kontatzeko eta egin duten dokumentazio-lan guztia ezagutarazteko. Aldez aurretik izena eman behar da.