Hasi dira Txurdinagako haurreskola berria eraikitzeko lanak

0 eta 2 urte bitarteko haurrentzako 52 plaza publiko berri eta doakoak izango ditu Txurdinagako haurreskola berriak. Bilboko Udalak aste honetan hasi ditu espazio berria eraikitzeko lanak, Txurdinaga HLHI eraikinean.

Proiektuaren obrak hasi dira dagoeneko eta "familiei plaza gehiago eskaintzea eta txikitatik hezkuntzarako sarbidea erraztea du helburu”, adierazi du Eider Bilbao Bilboko Hezkuntzako zinegotzi delegatuak.

Izan ere, azpiegitura berri honekin, Txurdinaga HLHIko Haur Hezkuntzako eraikinaren beheko solairuan kokatuko dena, hezkuntza goiztiarreko eskaintza handituko da, 0-1 eta 1-2 urte bitartekoentzat egokitutako lau ikasgela berrirekin. "2023an haur-eskola publikoetan zerbitzuaren doakotasuna ezarri ondoren gero eta plaza gehiago eskatzen direlako egin da jarduera hau, eta aurrerapauso handia da Bilbon doako eta kalitatezko haur-hezkuntza lortzeko. Gainera, lehendik dauden ikastetxeetan integratzen denez, hezkuntza-jarraitutasuna eta familia-kontziliazio handiagoa bermatzea lortzen da", azaldu du zinegotziak.

Proiektuak Next Generation funtsen Berreskuratze, Eraldaketa eta Erresilientzia Planaren finantzaketa du, zehazki 21. osagaia betetzeagatik: "Hezkuntza-sistemaren modernizazioa eta digitalizazioa, 0-3 urte bitarteko hezkuntza goiztiarra barne”. Horri esker, Txurdinaga HLHIk 0 eta 12 urte bitarteko hezkuntza-jarraitutasuna bermatu ahal izango du Pio Baroja HLHIko ikasleak 2025-2026 ikasturtean integratuko dituen ikastetxe berean.

Haurreskola berri hau, 1.387.014,97 euroko aurrekontuarekin (BEZa barne) eta %67,48ko finantzazio europarrarekin, aurtengo abenduaren 31 baino lehen amaituta egotea aurreikusten da, irekiera-data 2026ko lehen hiruhilekorako baita. Kasu honetan, gainera, 500 m-ko azalera da, eta haurreskolak behar bezala funtzionatzeko behar diren erabilera osagarriak izango ditu.