Ermuak swing tailerrak eskainiko ditu martxoan eta apirilean

Ermuko Udalak swing estiloa dantzatzen ikasteko edo hobetzeko tailerrak eskainiko ditu. Tailer horiek helduei bideratuta egongo dira, eta martxoaren 18tik apirilaren 8ra bitarteko astearteetan eskainiko dira, biak barne, bi orduko lau saio guztira, Lobiano kulturguneko liburutegiko hirugarren solairuko dantza-aretoan.

Hamabi plaza daude eta izena emateko epea zabalik dago. Parte hartu nahi dutenek 25 euroko tasa orokorra ordaindu beharko dute prestakuntzagatik edo 22,50 euroko tasa murriztua langabezian daudenentzat, erretiratuentzat edo "Gazte Txartela" duten ikasleentzat.

Ikastaroaren helburua swingaren mundua zabaltzea da, gorputz-adierazpena, erritmoa, sozializazioa eta sormena sustatuko dituen metodologia praktiko eta dibertigarri baten bidez. 18 urtetik gorako pertsonentzako jarduera honetan teknika, bikote-konexioa eta musikaltasuna landuko dira. Swing tailerra esperientzia dinamikoa, inklusiboa eta aberasgarria izango da. Lindy Hop estiloak (bikoteka, dinamikoa eta jolasekin), Charleston (kementsua eta jostalaria), Solo jazz (banakakoa eta urrats bereizgarriekin) eta Balboa (espazio txikietarako) barne hartzen dituen hastapen-tailerra izango da.

Dantza tailer honek ondorengo onurak eskaintzen ditu:

• Koordinazioa, oreka eta erresistentzia hobetzea.
• Sormena eta gorputz-adierazpena garatzea.
• Talde-lana eta sozializazioa sustatzea.
• Musikarekin konektatzea, modu aktibo eta dibertigarrian.
• Dantza soziala ezagutu ahal izatea.

Tailerra gehienez 12 lagunentzat izango da, eta gauzatzeko gutxienez 7 interesdun beharko dira.