Bilboko Udalak irailaren 1ean hasiko ditu García Rivero kalea berriz zolatzeko obrak

Astelehenean, irailaren 1ean, Bilboko Udalak García Rivero kalea berriz zolatzeko lanak hasiko ditu, Rodríguez Arias merkataritza-korridoreko obren bigarren fasearen barruan. Lan horiek aurretik eginda zeuden, baina Udalak ez zituen ontzat eman, ez baitzituzten betetzen udal-obra publikoetarako eskatzen ziren kalitate- eta akabera-estandarrak.

Hasierako lanak uztailaren erdialdean amaitu ziren, baina honako hauek aste batzuk atzeratzea erabaki zen ostalaritza-lokalen jardueran eragozpenik ez sortzeko, lokal horiek abuztuan terrazak instalatzeko baimena baitzuten. Eta espero da lanok bost edo sei asteko epean amaitzea.

García Rivero plataforma bakarreko bide bihurtu da, espaloi- eta galtzada-kotak berdindu egin dira, aparkalekuak kendu eta espaloiak zabalduta. Material berriekin berriro zolatu ondoren, 16 zuhaitz berri landatuko dira. Udazkenean landatuko dira, horixe baita sasoirik egokiena eta horrekin lanak amaitutzat joko dira.

Telesforo Aranzadi eta Rodríguez Arias kaleetan egindako lanekin, Rodriguez Arias kaleko obraren bigarren fasea amaitzeko aste batzuk baino ez dira geratzen, Garcia Rivero kaleko hauek eta Máximo Aguirre kaleko lanak amaitzen direnean. 

RODRÍGUEZ ARIAS KALEKO MERKATARITZA-KORRIDOREA

Udalak Rodríguez Arias kalearen izaera komertziala indartzeko planteatutako lanen bigarren faseak Elcano kalearen eta Recalde zumarkalearen arteko tartea eta Telesforo Aranzadi kalea hartzen ditu, baita Garcia Rivero eta Maximo Agirre ere, azken bi horiek Poza Lizentziatuaren eta Rodríguez Ariasen artean. Guztira, 6.800 metro koadroko eremua.

Obraren aurretik, azalera hori honela banatzen zen: % 44 oinezkoen espazioa eta % 56 ibilgailuen zirkulazioa. Obrak amaitutakoan, oinezkoen gunea % 62raino handituko da (guztira, 4.200 metro koadro).

Lan horiek 2024ko irailean hasi ziren eta 3.989.206,57 euroko aurrekontua dute (BEZa barne). 

Bestalde, Rodríguez Ariaseko merkataritza-korridorearen lehen faseak Recalde zumarkalearen eta Campuzano plazaren arteko tartea hartu zuen, hau da, 6.000 metro koadro inguru.

Bi faseak estetikoki eta funtzionalki bat etorriz garatu dira. Hala, hiri-irudi berri, moderno eta dotorea eman zaio inguruneari, Abando eta Indautxu arteko merkataritza-korridore gisa indartzeko eta Kale Nagusiko merkataritza-espazioaren osagarri izateko. 

Helburua kalitatezko eremu urbano berri bat sortzea izan da, bertan paseatzeko, hizketan egoteko, atseden hartzeko eta erakusleihoaren esperientziaz gozatzeko, betiere inguru horretako bizilagunen bizimoduarekiko oreka hautsi gabe eta begirunez jokatuz.