ingurumena

Eusko Jaurlaritzak Ingurunet sistema abian jarri du

Sistema berriak kudeaketari buruzko informazio eta tramitazioak eskaintzen ditu

09.02.2020 | 00:39
Ingurunet.

BILBO. Ingurunet sistema berria martxan dago, Eusko Jaurlaritzako Ingurumen, Lurralde Plangintza eta Etxebizitza Sailak jakinarazi duenez. Hori esker, ingurumen kudeaketari buruzko informazio eta tramitazioak egin ditzake.

Tresna abian jartzearekin batera, Ingurumen Sailburuordetzak  jardunaldi informatiboa antolatu du eta enpresa eta udaletako 300  ordezkari baino gehiago gonbidatu ditu. Hitzordua asteazkenean izango  da, apirilaren 10ean, Eusko Jaurlaritzaren Lakuako egoitzako  auditoriumean. Elena Moreno Ingurumen sailburuordeak tresnaren  ezaugarri, erabilgarritasun eta berritasun nagusien berri emango du.

Eusko Jaurlaritzak jakinarazi duenez, bere ingurumen alorrak  espediente kopuru handia tramitatzen du, eta kopuru hori hazten doa  urtez urte, hein handi batean, alorrean eskumena duten administrazio  ezberdinek ezarritako araudi eta kontrolak gehitu egin baitira,  bereziki Europar Batasunetik igorri diren zuzentarauen ondorioz.  Azken lau urteotan, Ingurumen Sailburuordetzak egindako komunikazio  eta izapideak %68 hazi dira: 2015eko 6.063 kasutik 2018ko 10.182  kasura.

Haien garrantziagatik, ingurumen inpaktuaren ebaluazioaren  espedienteen izapideak nabarmendu dira, ia hirukoiztu egin baitira  (193tik 527ra), bai eta airearen kalitatearekin lotutakoak (2018an  480 eta 2015ean 86) eta lurzoruaren kalitateari buruzkoak ere  (2015ean 1.147 eta 2018an 1.720). Ildo horretan, Plan eta Proiektuak  Ebaluatzeko Dekretu berri bat garatzen ari da, bai eta lurzoruaren  kutsadura prebenitu eta zuzentzeko legea garatuko duen Lurzoruen  Dekretua ere.

Bestalde, Ingurunet tresnaren helburu nagusienetako bat da  herritarrek, enpresek eta udalek euskal herri administrazioarekin  egin beharreko ingurumen kudeaketa guztiak sinplifikatu eta  bizkortzea, ahal den heinean, gaur egun ez baita hori gertatzen.

LAU MODULU

Sistema berria datozen egunotan jarriko da abian, eta lau modulu  izango ditu. Jarduera sailkatuak moduluaren bidez, Euskadiko udal  guztiek aukera izango dute ingurumen erakunde autonomikoari neurri  zuzentzaileen txostena eskatzeko, ondoren jarduera sailkatuaren udal  baimenak igortzeko.

Halaber, Natura Ondarea moduluarekin, edozein pertsona fisiko zein  juridikok, publiko edo pribatuk, Red Natura 2000 ekimenaren baitako  espazioei buruzko eragin txostenak eskatu ahal izango ditu,  proposatzen diren jardueren arabera.

Gainera, Kutsaduraren prebentzio eta zuzenketa bateratua  moduluaren bidez, araubide hori bete beharreko enpresa guztiek baimen  bateratu berri guztiak izapidetzeko aukera izango dute, ingurumen  erakundeak ezarritako prebentzio eta zuzenketa neurrien arabera  jarduerari hasiera emateko.

Azkenik, Etiketa ekologikoa moduluan, edozein pertsona fisiko edo  juridikok, publiko edo pribatuk, ingurumen ondorio txikiagoa  egiaztatzen duen produktu edo zerbitzuari dagokion etiketa ekologikoa  eskatu ahal izango du.

Ingurunet tresna eskuragarri dituen prozeduren katalogoa  eguneratzen joango da, pixkanaka, gaur egun lks sistemaren bidez  izapidetzen diren moduluak behin betiko "itzaltzeko". Halaber, laster  gehituko da ingurumen ebaluaziorako eta kutsatutako lurzoruen  ebaluaziorako araudiaren ondoriozko ingurumen baimen bateratuak eta  prozedurak aldatzearen ondoriozko izapideak egiteko aukera. Tresna  abian jarri eta garatzeari esker, ingurumen kudeaketari buruzko  prozedura administratibo guztiak elektronikoki tramitatu beharko  dira.