Zirrikituetatik begira

Kontraesanak

19.05.2020 | 00:15
Kontraesanak

BERRI zalea naiz, egunera ez ezik ordura egotea atsegin dut notiziaren gainean, beste edozertan ba nabil ere botoi baten klik batera pantailan nongo edo hango albisteak agertzen zaizkit aldioro. Irrati entzule fina ere ba naiz eta ordu seinaleak noiz joko adi, ondoren azken berriak entzuteko. Hori gutxi balitz, sare sozialak ez dira isiltzen edo gelditzen, denen artean egundoko anabasa eraginez. Dena den, ez dut etsipen nabarmenagorik inoiz sentitu horiekin; batetik gauza bera eta zenbaki hutsak direlako egun osoan eta, bestetik, kontraesan ikaragariak daudelako segun eta non informa-tzen zaren. Sinesgogor bihurtu arte, itxuraz guk baino askoz gehiago dakitenen artean oinarrietan ere ados ez direlako jartzen. Nabarmenena kasurako azkena, SARS-CoV-2 hori ez dela birusa 'exosoma' bat baizik; bata ez bestea ezagutzen ez ditudan arren, kontraesana begi bistan da.

Alor teorikotik eguneroko bizitzara abiatuz, etxetik ateratzeko protokolo edo direlakoak bere garaian Forges-ek egindako biñetak dakazkit gogora, gaur herri barruan, etzi albokora ere bai, hurrengoan probintziatik atera gabe, kirola egiten bai baina pasiatzen ez, kirola ere eliteko profesionala izanez gero neurri batzuk eta hirugarren mailakoa izanez beste batzuk, 70 urtetik gorakaoa izanez, ordu zehatz batzuk soilik –Bus edo autoz joanez?– Nahastea galanta eta arestian esan bezala teorian hainbeste dakiten batzuen ustetan alferrikakoak agian.

Musuko edo karetarena izan daitee adibiderik argiena. Busean edo trenean ibiltzeko beharrezkoa den bitartean beste toki itxi batzuetan ez, oraintsu arte eranginkorra zenaren zalantzatik, laster denerako derrigortua edota nonnahi oparitzetik eto 0.96 euroko gehiengo salneurritik bost edo 10 euroko diseinuzkoetara joanez. Tamalezko pandemia baten sartuak gaude, berria den heinean gutxi dakigu beraz, ikasteko bide edo traza gutxi eta zinez larriena, gero eta maizago aipatzen dutela udazkenerako beste bat datorrenaren mehatxua. Broma bat ematen du. Eta aurreko galdera batez bukatuko dut, Zertan da txerto edo bakunaren kontu hori?

noticias de deia