Bizkaia Frontoian jokatuko da gaur Bertsolari Txapelketa Nagusiko azken finalaurrekoa

Kalkulagailua eskura eduki beharko da gaurkoan. Izan ere, eta sailkapen nagusiari begira dagoeneko finaleko zortzikotea zein izango den atzematen bada ere, ezer ez dago erabakita. Gaur oholtzan arituko diren bertsolariek badaukate zer borrokatu, beraz. Mendiluzek, Illarregik eta Amets Arzallusek euren artean dituzte zenbakiak: 726,5, 711 eta 688 puntu dituzte, hurrenez hurren, eta finalerako sailkatuen artean egoteko orain arte txapelketan erakutsi duten maila mantentzea besterik ez dute egin behar izango. Mendiluze eta Arzallusek alde daukate esperientzia, eta Illarregi izan da txapelketa honetako bertsolari beri distiratsuenetako bat. Lehen parte hartzean, finalerako hautagai nagusien artean sartzea lortu dute hiruek, hartara. Alkaizak, Uriak eta Maddalen Arzallusek ez daukate hain eskuragarri Iruñako aulkia nahiz eta, erran bezala, dena dagoen oraindik jokoan. Saio bakarrean sailkapen zerrenda astintzea posible dela erakutsi du txapelketak orain artekoan. Sarrerak www.bertsosarrerak.eus atarian daude eskuragarri eta Bilbon bertan ere egongo da aukera, 15.00etatik aurrera, leihatilan. Frontoiko ateak 15.45ean irekiko dira.

Astero bezala, saioa zuzenean jarraitzeko aukera egongo da bertsoa.eus eta eitb.eus atarietan, eta ETB4 katean. Horrez gain, Bilbo Hiria irratiak zuzenean eskainiko du saioa Bizkaia frontoitik bertatik. Finalaurrekoen bigarren itzuliko hiru saioak ETB1ek eskainiko ditu larunbat gauean, lehen ganbarako lanetik aurrera.