BARAKALDO. Atzo arratsaldean, hilak 25, Barakaldok uztaileko ohiko osoko bilkura ospatu zen. Bertan, Udalak herriko kaleetan funtzio anitzeko paperontziak instalatzea aho batez onartu egin zuten, besteak beste.
Gobernu taldeak modu koordinatuan lan egin zuen neurri hori abian jartzeko, Auzoetarako eta Hirirako Obrak eta Zerbitzuak, eta Garapen Jasangarria eta Ingurune Naturala arloen bidez. Hala, Jon Andoni Uria zinegotziak iragarri du aurretiko azterketa bat egin dela proposamenaren bideragarritasuna ezagutzeko, eta, horri esker, tabakoentzako eta hautsontzientzako euskarri espezifikoak erabili direla Barakaldoko zakarrontzien modelo ohikoenetan. "Proiektu pilotu bat garatuko dugu neurriak nola funtzionatzen duen ikusteko, hautsontzi horiekin zakarrontziak osatzeko helburuz. Hasiera batean, auzo bakoitzean oinezkoen joan-etorri handiena duten kaleetan egingo dugu", aurreratu du Uriak, Auzoetako eta Hiriko Obra eta Zerbitzuen Arloko zinegotziak.
"Emanak ditugu dagoeneko lehen urratsak konpromiso hori laster errealitate izan dadin; aldez aurretik ikerketa bat egin dugu, hirian dauden paperontzietan 227 hautsontzi instalatzea baloratzeko", azaldu du Uriak. "Ikerketa honek bidea emango digu behin betiko proiektua egin ahal izateko eta lehenbailehen errealitate izan dadin", azpimarratu du. "Ziur gaude keinu txiki bat dela, baina benetan garrantzitsua da gure hiriarentzat, zigarro-mutxikinen arazoa benetakoa baita, eta irtenbide bat eman behar diogu", esan du, Eguzki Barakaldori eta Udaleko alderdi politikoei eskerrak emanez, "bai proposamenagatik, bai Barakaldok egunetik egunera jasangarriago eta ingurumena errespetatzen duen hiri baterantz aurrera egitea ahalbidetuko duten akordioak lortzeko jarrera onagatik", gaineratu du Uriak.
Alba Delgado Garapen Jasangarria eta Ingurune Naturala Arloko zinegotziak eskerrak eman dizkie Eguzkiri eta udaleko talde politikoei, zigarro-mutxikinak bide publikora botatzean sortzen den kutsaduraren aurka borroka egiteko akordioarekin bat egiteagatik. Zentzu horretan, "Aintzatespen berezia" agertu die talde ekologistari eta EH-Bildu eta Elkarrekin Barakaldo mozioaren sustatzaileei.
"Kudeatzen dudan arloan mozioa jaso nuenean, topagunea aurkitzeko deitu nien, eta elkarlanean aritu dira une oro, Udalak gai honi heltzeko zituen mugak ulertuta", gaineratu du Delgadok.
SENTIKORTZE KANPAINA
Onartutako mozioak, halaber, erretzaileei zuzendutako kontzientziazio-kanpaina bat egiteko konpromisoa dakar berekin, batez ere aisialdirako guneetan (terrazak pilatzen direnak, plazak, garraio- edo tren-geltokiak, etab.), hondakin horiek ingurumenean eta osasunean duten eraginaz sentikortzeko. Horretan, ostalaritzaren parte-hartzea bilatuko da.
Alba Delgadok azaldu duenez, "Garapen Iraunkorra eta Ingurune Naturala Arloak bere gain hartzen du barakaldarrak kontzientziatzeko mandatua, ez bakarrik kontsumoak osasunerako dakartzan arriskuei buruz, baita ekosistemen suntsiketan duen eraginari buruz ere, eta, batez ere, urari buruz".
Azkenik, horrelako hondakinak espazio publikoetan uzteagatik ezarritako zehapen-araubidea herritarren artean zabaltzea ere jasotzen du ekimenak.
