2020. urterako

13.643.241 euroko aurrekontua onetsi du Abanto-Zierbenako Udalak

10.02.2020 | 17:16
13.643.241 euroko aurrekontua onetsi du Abanto-Zierbenako Udalak.

ABANTO-ZIERBENA. Pasaden ostiralean, otsailaren 7an, Abanto-Zierbenako Udalak 2020 urterako aurrekontua onartu zuen. Guztira, 13.643.241 euroko aurrekontua izango dute.

Udalaren aurrekontua bost ardatz estrategikotan oinarritzen da:

  • Pertsonak dira udal-kudeaketaren eta gizarte-politiken garapenaren erdigunea.
  • Jarduera ekonomikoa eta enplegua, batez ere Abanto Zierbenako langabeentzat, enpresa berriak eta tokiko merkataritza bultzatuz.
  • Zerbitzu orokor iraunkorrei eustea eta horiek hobetzea.
  • Udal-azpiegiturak eta auzoak hobetzea, ikuspegi iraunkorretik.
  • Udalerriko elkartegintza bultzatzea.

Udalak 860.000 euro bideratuko ditu inbertsioetarako, kirol-instalazioak hobetu daitezen, hezkuntza-zentroetan etengabe hobekuntzak egin daitezen, argiztapen publikoa hobetu dadin eta landa-auzoetan Erantzun Plana gara dadin, besteak beste.

Abanto Zierbenako Udalbatzak gaur onartu du Udal Gobernuak 2020rako aurkeztutako udal-aurrekontuen proiektua, EAJ-PNV (6) eta PSE-EE (2) alderdien aldeko botoekin eta EH BILDU (2), INDAZ (2) eta ELKARREKIN PODEMOS (1) alderdien aurkako botoekin. Ekitaldi honetarako 13.643.241 euro izango dira udal-kontuetan. 2019. urtekoarekin alderatuta, ia milioi 1 euro gehiago izango dira, hau da, % 7,88 gehiago. Igoera hori honako hauei zor zaie batik bat: Udalkutxa 2020 funtsaren ekarpenari, zergak % 0,2 igotzeari eta eraikuntza, instalazio eta obren gaineko zergan izandako igoerari. Izan ere, Ezkerraldea Meatzaldea Parke Teknologikoko lanak hasi dira eta hainbat hirigintza-jarduera abian daude etxebizitza berriak eraikitzeko, udal-lursailak besterentzearekin batera.

"Udal honen finantza-osasuna eta -sendotasuna errealismoan, eragingarritasunean eta zuhurtzian oinarritutako kudeaketa ekonomiko baten emaitza dira. Gure proiektuak egonkortasuna eta ziurtasuna ematen dio Abanto Zierbenari. Printzipio horiek ezinbestekoak dira gure gobernu-taldearentzako udalerri gisa hazten jarraitzeko, pertsonen eta bizilagun guztien ongizatea eta bizi-kalitatea hobetzeko grinaren alde lan egiten duen udalerria izanik, Abanto Zierbenak bizitzeko eta lan egiteko udalerri erakargarria eta iraunkorra izaten jarrai dezan. Agerian utzi dugu gobernu honek gogor lan egiten duela eta eguneroko arazoez eta beharrizanez kezkatzen dela, eta horrelaxe jarraituko dugu" adierazi du Abanto Zierbenako alkate Maite Etxebarriak, PSE-EEko bozeramaile Maitana Martínez Goirirekin eta Ogasuneko zinegotzi Argiñe de la Cruzekin batera.

800.000 euro baino gehiago inbertsioetarako

Udal-inbertsioei dagokienez, Udalak 860.000 euro bideratuko ditu honako jarduera hauetara:

  • Kirol-instalazioak hobetzea; % 100 baino gehiago igo da. Partida horri esker, Gallartako Txikito pilotalekuko aldagaiak osorik berrituko dira eta moduluak jarriko dira Federico Valbuenan: 260.000 euro.
  • Argiztapena hobetzeko plana. Udalerriko ENBak eguneratuko dira, udalerri osoan 2.200 argi-puntu baino gehiago LED motako argietara aldatzeko: 200.000 euro.
  • Inbertsioak hezkuntza-eraikinetan: 185.000 euro; 120.000 euro gehiago hezkuntza-zentroetako kanpoaldeko eremuak, kanpoko argiztapena eta eskoletako haur-parkeak hobetzeko eta zoladura, arotzeria eta barnealdeko pintura berritzeko.
  • Landa-auzoetako Erantzun Plana garatzea, hainbat hobekuntza egiteko, besteak beste, bideetan, argiztapenean eta altzarietan, eta iritsiko diren bizilagunen eskaerei erantzuteko: 60.000 euro.
  • Hiri-altzari berriak jartzea: hirugarren komun publikoa jarriko da kirol-instalazioen eremuan eta Amalia González Astobiza haur-parkea egingo da. 50.000 euro.
  • Udalaren osoko bilkuren bideoakten sistema ezartzea, beste pauso bat emateko erakunde-gardentasuna hobetzearen eta administrazioa sinpletzearen eta modernizatzearen arloetan: 25.000 euro.
  • Horma berri bat egitea Los Llanos auzoan N-634 errepidearekin muga egiten duten etxebizitza batzuetan: 50.000 euro.

2020an, Sanfuenteseko Santa Barbara auzoan proiektatutako malda egingo da, egunero adinekoen etxera joaten diren adinekoen irisgarritasuna hobetzeko. Aurreko ekitaldiko aurrekontuan sartu zen.

Herritarren parte-hartzea da Abanto Zierbenako Udalak onartutako aurrekontuak ezaugarritzen dituen funtsezko beste alderdi bat. Bigarren urtez, 200.000 euro bideratu dira herritarrentzat.

579 bizilagunek parte hartu dute eta 36 proiektu bideragarri lortu dira. Proiektu horietako hiru bozkatuenak sartu dira 2020an egin beharreko inbertsioen artean.

Urtero legez, Udal Gobernuak oposizioko talde politikoen elkarrizketa eta partaidetza bultzatu ditu eta hainbat iradokizun sartu ditu proiektu honetan. Gobernu Taldeak elkarrizketarekin eta adostasunarekin duen konpromisoa berretsi du.

"Gaur onartutako aurrekontuak gure bide-orria izango dira eguneroko kudeaketan ABANTO ZIERBENA iraunkorragoa eta gero eta kohesionatuagoa eraikitzen jarraitzeko, herri honek pertsona guztientzako bizi-kalitatea, auzo guztietarako kalitatezko zerbitzuak eta bizitzeko eta lan egiteko erakargarritasuna eskaini dezan", esan dute, amaitzeko, aho batez Abanto Zierbenako Udaleko alkateak, Ogasuneko zinegotziak eta PSE-EE taldeko bozeramaileak.