Doakoa da

Emakumeok Elkarrekin Ibilian programa martxan da Barakaldon

Ekimenaren helburua kirola egitea eta ohitura osasungarriak sustatzea da

27.01.2020 | 14:46
Amaia del Campo eta Carlos Gomez.

BILBO. Emakumeok Elkarrekin Ibilian programa martxan da Barakaldon. Doako ekimenaren helburua kirola egitea eta ohitura osasungarriak sustatzea da.

Amaia del Campo alkateak gaur goizean aurkeztu du programa, Decathloneko ordezkari Carlos Gomezekin batera. Emakumeok Elkarrekin Ibilian iaz sortu zen proiektu pilotu gisa, jada finkatuta dagoen Emakumeok Elkarrekin Korrika programari osagarri bat eskaintzeko helburuarekin. "Badakigu emakume guztiek ez dutela kirol hau praktikatu nahi, beraz, buelta bat eman genion eta programa hau garatu genuen, gure bizilagunei taldean ibiltzeko hainbat ibilbide eskainita", adierazi du alkateak.

Azken azterketen arabera, gure gizartea gero eta sedentarioagoa da. Frogatuta dago ibiltzeak onura handiak eragiten dituela osasunean, eta, horregatik, ekimen honek oso harrera ona izan du hirian. Aste honetan emango diote amaiera lehen edizioari, eta datorren asteartean hasiko da bigarrena: otsailetik ekainera 20 plaza berri egongo dira eskuragarri.

Parte-hartzaileak 18:30ean hasiko dira eta ordubeteko ibilaldiak egingo dituzte hirian zehar, 19:30ak arte. Iazko ordutegia aldatu egin da, erabiltzaileek hala eskatuta.

Gainera, bi tailer jasoko dituzte hiruhileko bakoitzean hainbat gairen inguruan: kirol-nutrizioa, ohitura osasungarriak, emakumeei propio zuzendutako luzapenak eta martxa nordikoa. "Etxetik irtetea eta ibiltzea ez ezik, kontzeptu berriak eskuratzea ere bada helburua, parte hartzen duten emakumeek kirol-jarduera horretan aurrera egiteko eta ariketa beren gaitasun fisikoetara egokitzeko aukera izan dezaten", adierazi du Del Campok, eta Decathloni Barakaldorekin duen inplikazioa eskertu dio. Emakumeok Elkarrekin Ibilian programak kirol-materiala ematen die parte-hartzaileei.