Zinearen hirugarren astea ostegun honetan hasiko da Ermua Antzokian lau film berrirekin: Bolante baten historia, Cerca de ti, Mamá o papá eta Clifford, el gran perro rojo. Zehazki, emanaldiak ostegunetik asteartera izango dira. Antolatzaileek jakinarazi dutenez, oraindik eskuragarri dago urtarrileko bonoa Lobiano Kultur Gunean eta Antzokiko leihatiletan. Bertan, zineklubeko eta zine komertzialeko bederatzi filmak ikus daitezke, 16,90 euroan.
Zineklubarekin hasiko da programazioa ostegun honetan, Bolante baten historia dokumentalaren emanaldiarekin. Bortxazko desagertzeak ez du desagertutako pertsonaren bizitza bakarrik amaitzen; uretara botatako harri baten uhinak bezala, orbain emozional izugarria sortzen du familietan eta gizartean. 80ko hamarkadaren hasieran desagerrarazi zuten Jose Miguel Etxeberria Alvarez Naparra, Komando Autonomo Antikapitalistetako kidea. Komunikatu gurutzatuen, hainbat aldarrikapenen eta axolagabekeria judizialaren artean, bere familia desagerpenari erantzuna ematen saiatu zen. Berrogei urte baino gehiagoren ondoren, Eneko da anaiaren bilaketaren lekukoa hartu duena, hainbeste urte irekita daramatzan zauria ixteko. Iñaki Alforjak eta Iban Toledok zuzendutako filma 20:30ean izango da ikusgai, euskaraz, gaztelaniazko azpitituluekin.
Zine komertzialak larunbatean eskainiko du bere lehen saioa, 19:30ean, Cerca de ti filmarekin. Uberto Pasolinik zuzentzen du James Norton eta Daniel Lamont protagonista dituen drama familiar hau. Johnek, 35 urteko leiho-garbitzaileak, Michael lau urteko semea zaintzen dihardu buru-belarri, bere amak jaio eta berehala utzi baitzuen. Biek bizitza sinplea daramate, eguneroko erritualen bidez egina, pitzadurarik gabeko maitasun harreman batean. Zoritxarrez, Johni hilabete batzuk besterik ez zaizkio geratzen. Familiarik ez duenez, geratzen zaizkion egunetan Michael adoptatuko duen familia berri bat bilatzen saiatuko da, semea bizitzaren errealitate lazgarria aurkitzetik salbatzeko. Cerca de ti benetako gertakarietan oinarrituta dago, eta astelehenean ere ikusi ahal izango da, 20:30ean.
Asteko bigarren film komertziala Dani de la Orden zuzendariaren Mama o papa komedia izango da. Paco Leon eta Miren Ibarguren Flora eta Victor dira, haur guztiek izan nahiko lituzketen gurasoak: modernoak, dibertigarriak eta maitagarriak. Dibortziatzea erabakitzen duten egunean, ordea, dena okertzen da, eta bizitza osoan amesten daramaten lan-aukera agertzen zaie. Arazo bakarra dago: haurren zaintza. Inor ez dago amore emateko prest; beraz, epailearen aginduz, haurrek erabaki beharko dute norekin geratuko diren: aitarekin edo amarekin. Hemendik aurrera, guraso eredugarriek gerra hasiko dute eta ez da su-etenik izango. Biek ahal duten guztia egingo dute seme-alaben zaintza ez lortzeko. Mama o papa igandean 19:30ean eta asteartean 20:30ean emitituko da.
Haurrentzako zinemari dagokionez, igandean, 17:00etan, Clifford, el gran perro rojo filma proiektatuko da. Emily Elizabethek txakurkume gorri bat oparitzen dion abere-erreskatatzaile magiko bat ezagutzen duenean, ez zuen inoiz pentsatuko esnatzean hiru metroko zakur erraldoi bat aurkituko zuenik New Yorkeko bere apartamentu txikian. Bere ama ezkongabea negozio bidaian dagoen bitartean, Emily eta osaba Casey dibertigarri baina oldarkorra abentura handi batean murgilduko dira.
