ERMUA. Abuztuaren hasierarekin batera, Ermuko udako zinema saioak hasiko dira. Lehenengoa astelehenean izango da, eta hortik aurrera astelehen, asteazken eta ostiralero egingo dira Orbe Kardinalaren plazan. Saioak gauez eskainiko dira, 22:00etan konkretuki, eta eguraldi txarra egitekotan parrokia-elizako arkupeetan proiektatuko dira.
Lehenengo txanda honetarako 2019ko hiru zinta programatu dira, bai helduentzat, bai haurrentzat. Proiekzioak doakoak dira, baina edukiera kontrolatua izango dute, ezohiko osasun egoera dela eta. Horrela, segurtasun-neurri zorrotzak jarraituko dira, pertsonen arteko gutxieneko distantzia gordez. Gainera, publikoak bere maskara eraman eta eserita egon beharko du, eta barrutirako sarbidea eta hustea modu ordenatu eta mailakatuan egingo dira.
Abuztuak 3, astelehena: El viaje de Marta (Staff Only)
Udako zine ziklo honetan eskainiko den lehen filma El viaje de Marta (Staff Only) izango da. Neus Ballusek zuzendu eta Elena Andrada eta Sergi Lopez protagonista dituen drama honetan, Senegalgo resort batera oporretara doan familia bat ezagutuko dugu. Bertan, Marta, alaba nerabea, bere adineko jendea ezagutzeko eta lagunak egiteko desiratzen egongo da; eta, azkenean, bisitarien txangoak grabatzen dituen bitartean zinemagile izatea amesten duen hoteleko langile bat ezagutuko du. Desberdintasun sozialen eta kultura ezberdinen arazoa traba izango da neskarentzat, munduak nola funtzionatzen duen konturatzen hasiko baita.
Abuztuak 5, asteazkena: Cómo entrenar a tu dragón 3
Bigarren saioak familia osoarentzako animazio gau dibertigarria eskainiko digu, Cómo entrenar a tu dragón 3 filmaren eskutik. Bikingo gazte baten eta Furia Nocturna herensuge beldurgarri baten arteko ustekabeko adiskidetasuna bezala hasi zena, bere bizitzetan aurrera egin duen trilogia epiko bat bihurtu da. Pelikula berri honetan, Hipok eta Desdentaok, azkenean, euren benetako patua ezagutuko dute: batentzat, Isla Mema gobernatzea Astridekin batera, bestearentzat, euren espeziearen liderra izatea. Baina, bidean, batzen dituzten loturak frogatu beharko dituzte, inoiz aurre egin dioten mehatxurik handienari aurre eginez... eta Furia Nocturna eme baten agerpenari aurre eginez.
Abuztuak 7, ostirala: Yesterday
Aire zabaleko zinemaren lehen aste hau amaitzeko, komedia musikal bat izango dugu ikusgai: Yesterday. Danny Boyle zuzendari beteranoaren azken lanak Himesh Patel, Lily James, Kate McKinnon eta Ed Sheeran ditu protagonista. Jack Malik abeslari eta konpositore ingelesa da, eta musikaren munduan bidea egiten saiatzen ari da. Itzalaldi global batean autobus batek harrapatu ondoren, Yesterday kanta abesten du bere lagunentzat eta munduan Beatles taldea gogoratzeko gai den pertsona bakarra dela konturatzen da. Taldea sekula existitu ez zela konturatu ondoren, Jack haien abestiak interpretatzen hasten da, bereak balira bezala jokatuz eta mundu mailako ospea lortuz.
