BILBO. 60 urtetik gorako pertsonei bideratutako tailer birtualak jarriko ditu martxan Bilboko Udalak, 'la Caixa' Fundazioarekin sinatutako akordioari esker.
Proposatutako ibilbide guztiek helburu bera dute: giza funtzionamenduaren arlo guztietan garapen harmonikoagoa eta orekatuagoa lortzea, osasun eta ongizate hobean sakonduko duten jarduera osagarriak eskainiz. Era berean, zahartze ona sustatzen duten gaitasun eta baliabide pertsonalak maximizatu nahi dituzte, eguneroko motibazioa areagotuz, jarduera eta lotura desberdinen bidez.
Online tailerretako taldeak eratuko dira ibilbide hauetan: “Osasuna", adinekoei euren autonomia sustatzeko eta ongizatea hobetzeko beharrezko tresnak emateko; "Garapen pertsonala”, hazkunde pertsonala sustatzeko, haien aldeko estrategiak eta baliabideak aplikatuz; "Gaitasun digitalak", praktikan eta eguneroko erabileran teknologia berriak erabiltzeko bestelako proposamena, eta "Irakurketaren sustapena", liburu baten inguruan biltzeko eta hitz egiteko gune bat sortzeko.
Izena emateko epea gaurtik martxoaren 26ra artekoa izango da eta gehienez ere, hiru ibilbide aukeratu ahal izango dira hiruhileko bakoitzeko eta pertsonako. Izena emateko ezinbestekoa da gailu elektronikoa, kamerarekin, interneteko konexioa eta helbide elektroniko bat edukitzea. Izena emateko, 900 293 562 telefono-zenbakira deitu behar da, astelehenetik barikura, 10:00etatik 18:00etara.
Bizi dugun egoeraren, 'la Caixa' Fundazioaren Adinekoen Programak adinekoekin duen konpromisoa berresten du, egunerokotasuna berreskuratzeko jarduerak eskaintzen dizkie eta isolamendu sozialari eta bakardadeari aurre egiten lagunduko dieten harreman-espazioak eraikitzen ditu.
