Ekainetik urrira egingo da

Martxan da 'Txio ta Txio' bideoen hirugarren edizioa

31.05.2020 | 04:00
Txio ta Txio bideoen hirugarren edizioaren kartela.

BILBO. Hemen da 'Txio ta Txio' bideoen edizio berri bat. Aurtengoa hirugarren edizioa izango da, eta hurrengo astelehenetik, ekainak bat, urrira arte iraungo du. Bilboko Udalak antolatzen du ekimen hau, eta edizio honek uriko auzoetako istorio txikiak bilduko ditu: bertako bitxikeriak, pertsonaia garrantzitsuak, pasadizioak... Hori bai, hori dena batu behar izango da 80 segundoko bideoetan.

Proposamen hau Bilboko Udalaren Bilbao Izan ondarea eta historia zabaltzeko udal programaren barruan dago.

Txio Ta Txioren bideoak, Bilboko Udalaren sare sozialen profilez gain, Bilbao Izan-en Facebook-en eta Bilbao Kultura-ren Instagram-en aurkitu ahal izango dira. Handik, gure hiriaren historiaren zati txiki eta bitxi horiek ezagutzera eman nahi dituzten guztiek beren profiletan partekatu ahal izango dituzte, hiriko auzoen historia eta idiosinkrasia berreginez.

Publikazioak astean bitan egingo dira, astelehenetan eta ostegunetan, eta euskara eta gaztelania tartekatuko dituzte. Ekaina Arangoitirekin estreinatuko da, eta Deustu eta Erriberari; Ibarrekolandari eta Sarrikori; eta San Inazio eta Elorrietari lagako die lekukoa uztailean, abuztuan eta irailean, hurrenez hurren. Urrian, lehen aipatutako auzo horiei guztiei buruzko bideoak partekatuko dira.

Gainera, aurreko edizioetako bideoak -80 guztira, 540.000 bisita baino gehiago gehitzen dituztenak - Bilbao Kulturako YouTube-ren profilean bilduta daude. Bideoetan, Zurbarango familia batek 1976ko udan ikusi zuen OHE misteriotsuaren azalpena edo Txurdinagako dragoia ezagutuko dugu, baita Ciudad Jardín-eko etxe batera bisita egiteko aukera izango dugu, besteak beste.