Bilboko Udalak Zorrotzaurreko Beta II eraikina berritzea onetsi du

Bertan, Bilbao As Fabrik proiektuaren jarduerak garatuko dira

BILBO. Honako lan hauek egingo dira azterketa-fasea amaitzen denean: beheko solairua eta lehenengoa zaharberritu, fatxada berritu, bi auditorium sortu eta sarbideak zati batean eta behin-behinean urbanizatu, udal-titulartasunekoa den Beta I eraikinaren sarrerarekin lotzen diren arrapalak eta eskailerak barne. Zaharberritze-lanak egitean, lehentasuna emango zaie espazio irekiei eta eraikinaren eta inguruaren iragan industriala gogora ekarriko duen estetikari.

UIA programaren esparruan, tokiko hamar bazkidez osatutako talde bat egongo da honako hauek diseinatzeko: prestakuntza-programak, networking-ekintzak eta start-up direlakoak estimulatzen eta ahalbidetzen dituzten proposamenak. Gainera, ideien behatoki eta laborategi bat jarriko da martxan. Gori guztia Euskadin 4.0 industria-eredu bat hedatzeko katalizatzaile gisa jarduteko. Proiektuaren aurrekontuaren barruan, partida bat Beta II eraikina zaharberritzeko erabiliko da.

Beta II eraikinean dagoen Bilbao As Fabriken egoitzatik, lau jarduketa garrantzitsu koordinatzen dira:

•     Unibertsitateko ikasleei, pertsona ekintzaileei eta profesionalei zuzendutako prestakuntza-programak, ekonomia digitalean 4.0 industriako erronkei aurre egitea xede dutenak.
•     Alor publiko eta pribatuko eragile edo interes-talde nagusien artean networking-ekintzak gauzatzea, industria-sektoreko oraingo eta etorkizuneko beharrei erantzuteko bideragarria nahiz eraginkorra den estrategia bakarra koordinatze aldera.
•     Bilbon egoitza duten start-up direlakoen merkaturatzea bultzatzeko eta errazteko proposamenak, 4.0 industriak nazioartean kokatzeko eskatzen duen ezagutzari, espezializazioari eta teknologiari lotutakoak.
•     Ideien laborategi eta behatoki bat abiaraztea, non alor teknologiko, 4.0 industriako eta ekonomia digitaleko joerak aztertuko diren tokiko enpresek aurre egin behar dituzten erronkak identifikatzeko eta erronka horietarako irtenbide berritzaileak proposatzeko.

BILBAO AS FABRIK

Bilbao As Fabrik proiektuaren helburua da 4.0 industriarako eta ekonomia digitalerako zerbitzu aurreratuak sustatzea Zorrotzaurre ekosistema berritzaile gisa egonkortzeari begira. Bilboko Udalak sustatzen eta zuzentzen duen hiri-proiektu bat da, eta finantzaketarako Europako Batzordearen laguntza jasotzen du Eskualdeko Garapenerako Europako Funtsen bitartez, UIA (Urban Innovative Actions) proiektu gisa hautatua izan ostean. Alde batetik, Urban Innovation Actions (UIA) programa, eta, bestetik, Hiri Garapen Jasangarrirako Integraturako Estrategia (DUSI)

Udalak Bilbao Ekintza udal-entitatearen bitartez hartzen du parte ekimenean, baina, beste bazkide estrategiko batzuk ere baditu, hala nola Mondragon Korporazioa, Mondragon Unibertsitatea, MIK, Orkestra, GAIA, IDOM eta EKIN. Horrek agerian uzten du lankidetza publiko-pribatua zein garrantzitsua den hiriko etorkizun ekonomiko lehiakor eta jasangarriari laguntzen dioten ekimen handiak bultzatzeko orduan.

ZORROTZAURRE, AUKEREN EREMUA

Zorrotzaurreko uhartea inbertsioak erakartzeko eta aukeretarako eremu gisa eraikiko da, eta, horrela, garapen ekonomikoa sustatuko da. Zorrotzaurreko uhartearen garapen-plana Bilboko hiri-berroneratzea erdiesteko azken operazioa da. Era berean, proiektu integral eta jasangarri bat dugu, zeinaren bitartez industria-barruti zahar bat barruti teknologiko bati lotutako eremu berri batekin konektatzen den. Bertan, honako hauek ditu: etxebizitza irisgarriak, enpresak ezartzeko eremu ez kutsatzaileak, askotariko gizarte- zein kultura-ekipamendu eta -tresnak eta aisialdirako eremu asko. Zorrotzaurre, halaber, anbizio handiko Hiri Garapen Jasangarri eta Integraturako Estrategia bat ezartzeko agertokia da. Hain zuzen ere, Eskualdeko Garapenerako Europako Funtsak finantzatu du.

DUSI estrategiak jarduketa-multzo bat kofinantzatuko du Zorrotzaurren, ekonomiari, ingurumenari, klimari, demografiari eta gizarteari lotutako erronkei aurre egiteko. Horren barruan, Beta II eraikina zaharberritzeko lanen zati bat kofinantzatuko da.