San Pedro jaietako egitaraua aurkeztu du Sestaok

Astearte honetan goizean,Sestaoko Udalak datorren ostiralean hasiko diren San Pedro jaietako egitaraua aurkeztu du. Musika, kultura eta kirola izango dira ardatz nagusiak, eta guztira adin guztietarako 104 jarduera eskainiko dira ekainaren 19tik 29ra bitartean.

Programa diseinatzeko orduan, kontuan hartu da adin guztietako pertsonek eta interes anitzekoek proposamen erakargarriak izatea jaiez gozatzeko. Programazioak jarduera finkatuak eta herriko jai-tradizioan sakonki errotuak konbinatzen ditu ekimen berriekin kultur eta aisia eskaintza zabaltzeko.

Aurkezpenean, zinegotziak jaien izaera parte-hartzailea azpimarratu du, eta kultur, kirol eta gizarte elkarteen inplikazioa eskertu du, bai eta talde eta pertsona askoren lankidetza ere, urtez urte posible egiten dutelako programa zabala antolatzea. "Sestaoko jaiek berezko nortasuna dute urte osoan pertsona askok lan egiten baitute ekaineko egun hauetan herritarrak kalera irten ahal izateko gozatzera", azpimarratu du zinegotziak.

Era berean, bereziki aintatetsi nahi izan du kuadrillen eta txosnen lana. Beren partaidetza funtsezkoa da kaleak dinamizatzeko eta programazioa berezko jarduerekin aberasteko herritarren bizikidetza eta partaidetza sustatze aldera.

Buruhandiek irakurriko dute pregoia

Jaietako unerik zirraragarrienetakoa pregoia irakurtzearena izango da. Aurten,Udalak zenbait belaunaldi sestaoarrek tradiziorik maitatuenetarikoa omendu nahi izan du. Horregatik pregoilariak buruhandiak izango dira, eta Lobito Buruhandiak Kultur Elkarteak ordezkatuko ditu. Helburua da aintzatestea 60 urtez etengabe izan direla Sestaoko jaietan. "Merezitako omenaldi bat da hamarkada askotan udalerriko kaleak ilusioz betetzen eta milaka herritarren memoria kolektiboan sartzen lagundu duen erakundearentzat", azaldu du García de Andoinek.

Berriz ere musikak toki nagusia izango du jaien programazioan. Duela egun batzuk, Udalak aditzera eman zituen edizio honetako kontzertu nagusiak, besteak beste, honako talde eta artista hauekin: En Tol Sarmiento, El Drogas, Orquesta Vulkano, Orquesta Krypton, Potato eta Neomak.

Musika-kartel honi formatu txikiko beste proposamen batzuk batuko zaizkio, eta San Pedro plazako eta Begoñako Andra Mari ikastetxearen jolastokiko eszenatokien artean banatuko dira. Eszenatoki horietako proposamenak bereziki familientzat eta adinekoentzat izango dira: dantzaldiak, folklorea, kaleko antzerkia, gospela, boleroak, swinga, dantza linean, hirurogeita hamarreko eta laurogeiko hamarkadetako arrakasta handien ikuskizunak, haurrentzako diskofestak, folk musika eta italiar klasikoen kontzertua, beste jarduera batzuen artean.

Berrikuntza modura, aurten programazioak bi musika-emanaldi izango ditu bermutaren orduan, igande goizetan, Kittu eta Rockalean taldeekin.

San Joan gaua

Tradizio errotuenak ere zeregin protagonista izango dute jaietan. Oraingoan ere herritarrek zezensuzkoak izango dituzte Las Llanas zumarkalean, edizio honetan hitzordurik esperoenetakoa. Era berean, San Joan su tradizionala berriz egingo da hilerriaren atzealdean, nahiz eta aurten errepidean kokatu suaren inguruan zirkulu handi bat sortzeko eta herritarren partaidetza bultzatzeko. San Joan gaua correfocseko desfile izugarriarekin amaituko da, herriko jai-egutegiaren ekitaldirik ikusgarrienetako eta parte-hartzaileenetako bat.

Erraldoiak eta buruhandiak udalerriko kaleetan zehar ibiliko dira kalejira tradizionaletan, txikienei dibertsioa eta ilusioa eramanda. Gainera, txikienek berariazko programazioa izango dute. Zenbait jardunalditan, haurrentzako parkeak jarriko dira, eta jarduera ugari antolatu ere bai familiek jaiez batera gozatzeko.

Halaber, kultur programazioan abesbatzen emanaldiak sartuko dira Orfeoiaren eta zenbait abesbatzen ardurapean, eta berriz ere agerian geldituko da Sestaok genero horren aldeko interes handia duela.

Nerabeek berariazko jarduerak izango dituzte Gaztelekuak antolatuta, eta proposamenak beren interes eta beharretara egokituko dira. Halaber, ez da faltako barraken barrutia Las Canterasen, espaziorik jendetsuena eta familiek gehien espero dutena egun hauetan.

Jaiek, gainera, herriko kultur ondarearen jarduerarik adierazgarrienei eutsiko diete, hala nola txori abeslarien lehiaketa tradizionala edo dantzen alarde txikia, herriko nortasuna eta tradizioak zaintzen lagunduz.

Era berean, kirolak presentzia nabarmena izango du tokiko kluben lankidetzari esker. Programazioan sartuko dira erakustaldiak eta lehiaketak, besteak beste, igeriketa sinkronizatuaren edo xakearen diziplinetan, beste proposamen askoren artean. Hari gehitu beharko zaio Sestao Kirolak erakundeak antolatutako eskaintza. Herritarrei goi-mailako lehiaketak gerturatuko dizkie, hala nola eskuzko eta palazko pilota-partida profesionalak.

Puntu morea

Bestalde, Udalak beste urte batez berretsi nahi du jai seguruak, inklusiboak eta edozein indarkeriarik gabekoak antolatzearen aldeko konpromisoa. Horretarako, Puntu Morea egokituko du San Pedro plazan, eta bertan indarkeria matxistak prebenitu eta haiei arreta emateko profesional adituak izango dira. Zerbitzua jardunean egongo da 00:00etatik 06:00etara, ostiral eta larunbat gauetan, eta 00:00etatik 03:00etara igandetik ostegunera.

Carlos García de Andoinek herritar guztiei gonbita luzatu die jaietan eraginkortasunez parte hartzeko eta diseinatutako programazioaz gozatzeko, herriarekiko kidetasun-sentimendua partekatu, batera bizi eta indartze aldera. Era berean, erantzukizuna, errespetua eta gizalegea eskatu ditu egun horiek pertsona ororentzat jai-giroan, modu seguruan eta adeitsuan garatzeko.

Programazio zabal honi esker, Sestao prestatzen ari da hamaika egun bizitzeko jarduerez, kulturaz, musikaz, kirolaz eta tradizioaz blai. Hala, jai partehartzaileak finkatuko dira, herriko gizarte- eta erkidego-bizitzaren adierazpenik nagusienetakoak baitira.