Durangoko Kirol Egunen bigarren edizioa ospatuko da asteburuan
21 klub, elkarte eta kirol erakunde bilduko dira ekainaren 13an eta 14an
Aurreko edizioak izandako harrera bikaina kontuan hartuta, Durangoko Udalak martxan jarriko du datorren asteburuan, ekainaren 13an eta 14an, Kirol Egunen bigarren edizioa. Ekimen honen helburua udalerriko kirol eskaintza zabala ezagutzera ematea da, bertako klub eta erakundeen eskutik.
Bi egunez, Landako Guneak jarduerak, erakustaldiak eta informazio guneak hartuko ditu, adin guztietako herritarrek kirolaren inguruko esperientzia partekatuak bizi, klub eta elkarteekin harreman zuzena izan eta proposamen ireki eta parte-hartzaileez gozatzeko. Horrela, Durangoko Kirol Egunak Durangoko kirolaren erakusleiho gisa sendotzen da, baita kirola egiteko ohitura eta bizimodu osasungarriak sustatzeko topagune gisa ere.
Ekainaren 13an, larunbata, egitaraua goizez eta arratsaldez garatuko da. 10:00etatik 14:00etara, Alpino Tabira Mendizale Taldea, Arripu Futbol Kluba, Durango Rugby Taldea, Ibaizabal Eskubaloi Taldea, Cultural Deportiva de Durango, Durango Fight Factory, Sociedad Ciclista Duranguesa, Padelzaleak, Mendibeltz Kirol Taldea, Mugarra Triatloi Taldea, Ouraiby Kirol Elkartea eta Uztai Taldeaak hartuko dute parte. Gainera, Ibaizabaleko kalistenia parkean Street Workout Together-ek antolatutako kalistenia jardunaldia egingo da: 10:00etatik 12:00etara 18 urtetik gorakoentzako saioa izango da, eta 12:00etatik 14:00etara, berriz, 12 eta 17 urte bitarteko gazteentzakoa. Arratsaldean, 16:00etatik 20:00etara, jarduerek aurrera jarraituko dute Larrasoloeta Xake Taldea, Durango Rugby Taldea, Ibaizabal Eskubaloi Taldea, Tabira Igeriketa Taldea, Padelzaleak, Mendibeltz Kirol Taldea eta Torneos Durango taldeen parte-hartzearekin.
Ekainaren 14an, igandea, jarduerak 10:00etatik 14:00etara egingo dira, eta parte-hartzaileen artean izango dira Larrasoloeta Xake Taldea, Durango Rugby Taldea, Ibaizabal Eskubaloi Taldea, Tabira Igeriketa Taldea, Torneos Durango, Haszten, Indar Xsport, Ninjutsu Wadokan, Mugarra Triatloi Taldea, Ouraiby Kirol Elkartea, Club Pelotazale Durango, Tabirako Saskibaloi Taldea, Arkulariak, Mobidurango, Sapuberri Boleibol Taldea eta Bidezabal Atletismo Taldea. Era berean, Landako Gunean Zumbathon bat egingo da 10:00etatik 11:50era; ariketa fisikoa eta musika uztartuko dituen herritar guztiei irekitako jarduera izango da.
Bigarren edizioa
Bigarren edizio honetan Durangoko 21 klub, elkarte eta kirol erakundek hartuko dute parte: Alpino Tabira, Arkulariak, Arripu Futbol Kluba, Club Pelotazale Durango, Cultural Deportiva de Durango, Durango Rugby Taldea, Haszten, Ibaizabal Eskubaloi Taldea, Indar Xsport, Larrasoloeta Xake Taldea, Mobidurango, Mugarra Triatloi Taldea, Ninjutsu Wadokan, Ouraiby Kirol Elkartea, Padelzaleak, Sapuberri Boleibol Taldea, Sociedad Ciclista Duranguesa, Tabira Igeriketa Taldea, Torneos Durango eta Uztai Taldea.
Iker Txertudi Durango Kiroletako zinegotzi eta presidenteak eskertu egin du bigarren edizio hau posible egingo duten klub eta elkarteen lankidetza. “Erakunde bakoitzaren atzean ordu askotako lana, konpromisoa eta talde-lana daude, eta asteburu hau aukera paregabea izango da herritarrek ahalegin hori guztia gertutik ezagutzeko. Durangok kirol eskaintza zabala eta askotarikoa du, eta Durangoko Kirol Egunek aukera ematen dute eskaintza hori espazio berean biltzeko, herritarrek jarduera berriak ezagutu, zalantzak argitu eta esperientziak partekatu ahal izan ditzaten. Espero dugu herritar asko animatzea asteburuan bertaratzera eta gure udalerriko kirolaren indarra eta aniztasuna agerian uzten dituen ekitaldiaz gozatzera”, adierazi du.