Bizkaia zubiak Erreskate Teknikoari buruzko lehen Jardunaldiak jaso ditu

Larunbat honetan, ekainaren 6an, Bizkaiko zubia goi-mailako simulazio eta entrenamendu teknikorako gune bihurtu da, bertan ospatu den Erreskate Teknikoari buruzko lehenengo Jardunaldia dela eta. Soka Erreskatet Teknikoen Sorosle Elkarteak (ARTCE-SETSE) antolatu du, Bizkaiko Foru Aldundiko Prebentzio, Suhiltzaile eta Salbamendu Zerbitzuarekin (PSSZ) indarrak batuz. Ekimenak altuerako erreskate teknikoan espezializatutako Estatu osoko suhiltzaile-zerbitzuetako ehun profesional baino gehiago bildu ditu.

Euskadin halako topaketa bat egin den lehen aldia izan da. Normalean, erreskate teknikoan eta eragiketa bertikaletan espezializatutako Europako hiri bakan batzuetan baino ez da egiten, eta, beraz, hiri-agertoki berezietan egiten diren halako ekimen teknikoak bultzatzen dituzten lurraldeen zirkuituaren barruan kokatu du Bizkaia.

Estatu osoko espezialistak agertoki bakarrean

Programaren barruan, benetako larrialdi-egoerak erreproduzitzeko diseinatutako altuerako eta espazio konplexuetako erreskate-ariketak egin dira. Maniobrak aldi berean egin dira zubi esekiaren hainbat gunetan, Portugaleteko dartsenan eta bi ertzetako beste eremu batzuetan, eta esku hartzeko eta ebakuatzeko prozedura aurreratuak ikusi ahal izan dituzte herritarrek.

Planteatutako proben artean, honako hauek nabarmendu dira: azpiegituraren tiranteetan altueran zintzilikatutako langileen erreskateak, espazio konfinatuetako maniobrak, hegal-egituren azpian egindako ebakuazioak, eta aurrera egiteko eta ateratzeko ariketak, dartsenaren gainean, urarekin kontakturik izan gabe.

Guztira, Estatuko hainbat puntutatik etorritako hamabi talde espezializatuk parte hartu dute. Prozesu tekniko bat egin zen talde horiek hautatzeko, eta esperientzia operatiboari, segurtasunari eta gaitasun teknikoari lotutako irizpideak baloratu ziren. Bartzelona, Valentzia, Malaga, Granada, Donostia, Nafarroa, Palma, Burgos, Toledo, Linares, Jaén eta Ceutako zerbitzuek parte hartu dute.

Bizkaiko Foru Aldundiko Suhiltzaile Zerbitzuarentzat, jardunaldi hauek aukera aparta dira prozedurak partekatzeko, zerbitzuen arteko koordinazioa hobetzeko eta erreskate espezializatuan diharduten profesionalen eguneratze teknikoa sustatzeko.

Ariketa operatiboez gain, jardunaldiaren barruan ekintza hauek egin dira: material teknikoaren erakusketak, dibulgazio-jarduerak eta larrialdien eta segurtasunaren arloko profesionalen arteko topaketak, parte hartu duten taldeen artean ezagutza teknikoa eta prestakuntza espezializatua trukatzeko aukera emateko.

Antolatzaileek nabarmendu dute, halaber, jardunaldi horrek aukera eman diela herritarrei hur-hurretik ezagutzeko erreskate-taldeek konplexutasun tekniko handiko egoeretan duten funtzionamendua, prestakuntza eta erantzun-gaitasuna.

Koordinazio instituzionala eta dibulgazio teknikoa

Dispositiboak antolaketa- eta prebentzio-operatibo zabala izan du, erakundeen eta larrialdi-zerbitzuen artean koordinatuta, itsasadarraren bi ertzetan jarduera guztiak behar bezala garatzen direla bermatzeko baliatutako teknikari espezializatuak, ekipo logistikoak eta prebentzio-baliabide sanitarioak barne. Era berean, Getxo eta Portugaleteko udalen eta Bizkaia Zubia entitatearen laguntza instituzional eta logistikoa izan du jardunaldiak.

Halako topaketek aukera ematen dute larrialdi-zerbitzuen arteko lankidetza indartzeko, esku hartzeko prozeduren etengabeko hobekuntza sustatzeko eta erreskate-taldeek konplexutasun tekniko handiko egoeretan egiten duten lan espezializatua herritarrei ezagutzera emateko.

Lehenengo edizio honetan, formatu handiko ekitaldi teknikoak egiteko kokapen berezi moduan estreinatu da Bizkaia zubia, eta, horri esker, Bizkaia erreferente emergente gisa kokatu da erreskate tekniko espezializatuaren eremuan.