Kolonbiarekiko elkartasun jardunaldia hartuko du Amorebieta-Etxanok
Musika, dantza, hitzaldiak eta gastronomia uztartuko ditu egitarauak, Kolonbiako kultura eta herriaren errealitatea herritarrengana hurbiltzeko helburuarekin
Amorebieta-Etxanoko Udalak indarrak batu ditu beste hainbat eragilerekin Kolonbiarekiko elkartasun jardunaldia antolatzeko. Larunbat honetan ospatuko da, maiatzaren 23an, Ogenbarren auzoan, eta kulturartekotasuna, memoria historikoa eta herrien arteko elkartasuna izango ditu ardatz. Antolatutako egitarauak musika, dantza, hitzaldiak eta gastronomia biltzen ditu.
Egitaraua
Jardunaldia 16:00etan hasiko da, Freytter Elkartearen aurkezpenarekin. Ondoren, Mauricio Pabón Lozano idazle eta erbesteratu politikoak hitzaldia eskainiko du, Martxelo Álvarez eta Ahaztuak 1936-1977 kolektiboarekin batera. Saio horretan memoria, erbestea eta giza eskubideen inguruko gogoetak partekatuko dira.
Arratsaldeak aurrera egin ahala, kultur eta musika proposamenek hartuko dute protagonismoa. Sol Ekintiren eskutik erresistentzia musikaz gozatzeko aukera izango da, eta ondoren salsa caleñako tailer irekia egingo da Kristel Tobarren gidaritzapean. Musika dekolonialaren DJ saioak ere izango dira, Siwanabaren eskutik, baita Lolo Callejoren kunbia eta akordeoi emanaldia ere.
Egitaraua Txanba Payes kantautore latinoamerikarraren kontzertuarekin eta Ajalalaneciaren DJ set kolonbiarrarekin amaituko da gauean.
Jardunaldian zehar, gainera, Kolonbiako mokadutxoa eta azokatxoa izango dira, herritarrek herrialdeko gastronomia eta artisautza gertutik ezagutzeko aukera izan dezaten.
Ekimen honen bidez, antolatzaileek elkartasuna, kultura-aniztasuna eta herrien arteko loturak indartu nahi dituzte, auzo giro ireki eta parte-hartzailean.