Asteazken honetan goizean, apirilaren 22an, Durangoko Udalak Dantzaren Eguna ospatzeko prestatutako egitaraua aurkeztu du. Hala, datorren larunbatean, L’Atelier Dantza Eskolako 600 dantzari inguruk Landako Gunea beteko dute publiko guztiei zuzendutako jardunaldi berezi batean.
Egitaraua
Eguna 10:00etan hasiko da, haurrentzako tailerrekin; besteak beste, maskarak egiteko tailerra, aurpegi-margoketa eta akrobaziak eskainiko dira. 11:00etan hasiko dira lehen emanaldiak, ballet-barrarekin, eta 12:00etan ballet emanaldiak izango dira, leku berean.
13:30ean, herritar guztientzako bazkari irekia egingo da, eta bertan bildutako dirua Koreo Dantza Elkarteari emango zaio, parte hartzen duten dantzarien familiei laguntzeko. Arratsaldean, 15:00etan bingoarekin jarraituko da, eta 15:45etik aurrera dantza moderno, urbano eta garaikideko emanaldiak eskainiko dira, arratsalde osoan zehar. 18:45ean, rifen zozketa egingo da atsedenaldi batean. Eguna amaitzeko, 20:00etan swing tailerra eta saio irekia izango dira, Swing Talde Durangaldea taldearen eskutik, parte hartu nahi duen edonorentzat.
Taberna eta denda
Jardunaldi osoan zehar, taberna eta denda egongo dira, eta bildutako dirua L’Atelierreko ikasleei bideratuko zaie, izan ere, Koreo Dantza Elkarteak antolatutako lehiaketetan parte hartzen dute.
Paule Sanchez Kulturako zinegotziak dantzaren garrantzia azpimarratu du gizarte-loturak sendotzeko tresna gisa: “Dantzaren Eguna aukera bikaina da gure aniztasun kulturala eta artistikoa ospatzeko, jendea elkartzeko eta tokiko talentua sustatzeko”, adierazi du.
