Durangoko Udalak herritarrei bideratutako jarduerez betetako programazio berezia eta zabala prestatu du apirilean zehar Durangoko Merkatua berraktibatzeko. Horien helburua ezagutza gastronomikoa sustatzea da, tokiko produktuei balioa emateko eta topagune hurbil eta dinamiko batean parte-hartzea bultzatzeko.
Ildo horretan, ostegunetan arratsaldeko 18:00etan, hainbat prestakuntza- eta dibulgazio-proposamen garatuko dira. Hala, apirilaren 16an oilaskoaren zatiketan eta aprobetxamenduan oinarritutako sukaldaritza-tailerra egingo da, egunerokoan teknika erabilgarriak ikasteko jarduera praktikoa eskainiz. Ondoren, apirilaren 23an, Euskal Sagardoaren dastaketa egingo da, euskal sagardoa ezagutu eta dastatzeko aukera emanez. Azkenik, apirilaren 30ean, Aletik ogira I saioa egingo da, Ekoizlea ezagutzen jardueraren baitan; bertan, alea lehengaitik abiatuta ogi bihurtzeko prozesua landuko da.
Programazioaren amaiera
Bestalde, programazioa larunbat goizetako jarduerekin osatuko da. Horrela, apirilaren 11n, 8:30ean, Amatxo Gaztak izango da ekoizle gonbidatua, eta bertaratzen direnek bere produktuak ezagutzeko eta bere lana gertutik ezagutzeko aukera izango dute. Era berean, apirilaren 25ean show cooking saioa egingo da basalandare jangarrien inguruan, eta bertan horien sukaldaritza-aukerak erakutsiko dira.
Mireia Elkoroiribe Durangoko alkateak bereziki azpimarratu du merkatuaren dinamizazioa bultzatu behar dela proiektuaren funtsezko elementu gisa: “Durangoko Merkatuak espazio bizia eta dinamikoa izan behar du, urte osoan zehar jarduera sortuko duena eta herritarrak erakarriko dituena. Dinamizazioa funtsezkoa da benetako topagune bihurtzeko, tokiko merkataritza indartzeko eta gure hurbileko produktuei ikusgarritasun handiagoa emateko. Horrela bakarrik lortuko dugu merkatua motor ekonomikoa izatea eta Durangoren nortasunaren isla izatea”.
