Barakaldoko Udalak ekintza bandaliko bat salatu du Andikollanoko arrapala mekanikoan

Harrikada batekin hautsi zuten duela egun batzuk Andikollanoko arrapala mekanikoaren alboetako kristaletako bat. Azpiegitura horren funtzionamendurako ezinbesteko elementua denez, arrapala hainbat astez geldiaraztera behartzen du. Barakaldoko Udalak ekintza bandalikoa salatu egin du.

Arrapalak kristalak ditu bi aldeetan, eta, funtzio estetikoa betetzeaz gain, eusteko eta segurtasuneko elementu gisa ere balio dute. Horietako bat hautsi denez, instalazioa geldiarazi behar izan da, behar bezala funtzionatzen duela bermatzeko.

Kristala, kenduta

Udalak dagoeneko kendu du kaltetutako kristala, eta beste bat egiteko eskatu du, neurrira egin beharrekoa. Enpresa arduradunak jakinarazi duenez, pieza berria entregatzeko eta instalatzeko epea sei aste ingurukoa da, eta epe hori fabrikaziodenboraren arabera luza daiteke. Birjarpenaren kostua 2.800 eurokoa da.

Asier Umaran Udal Zerbitzuetako zinegotziak gogor gaitzetsi du gertatutakoa, eta ekipamendu publikoekiko errespetua eskatu du."Erabat onartezina da horrelako ekintza bandaliko batek egunero dozenaka bizilagunek auzoen artean mugitzeko erabiltzen duten sarbide mekaniko bat zerbitzutik kanpo uztea", adierazi du Umaranek. "Ezin dugu onartu gutxi batzuen jokabide arduragabeak herritar guztiei kalte egitea", azaldu du.

Azpiegitura garrantzitsuak

Zinegotziak, gainera, gogorarazi du horrelako azpiegiturak bereziki garrantzitsuak direla pertsona askorentzat. "Hiriko arrapalak eta igogailuak funtsezkoak dira gure hiriaren irisgarritasuna hobetzeko, bereziki adinekoentzat, mugitzeko arazoak dituztenentzat edo haur-gurdi edo aulkiekin mugitzen direnentzat. Horregatik, guztionak diren ekipamenduekiko errespetua eskatzen dugu".

Udalak azpimarratu du espazio eta zerbitzu publikoak zaindu behar direla, ekintza bandalikoek udal-kutxei kostu ekonomiko handia eragiteaz gain, zuzenean eragiten baitiote herritarren bizi-kalitateari.