Barakaldok hiru arrapala mekaniko instalatuko ditu Arrontegin

Barakaldoko Udalak datozen asteetan aterako du lizitaziora Arrontegi auzoko irisgarritasuna hobetuko duten hiru arrapala mekaniko eraikitzeko obren proiektua. Guztira 1.835.243,45 euroko aurrekontua bideratuko du, eta aurreikusitako epea 11 hilabetekoa izango da.

Auzotarrek eskatuta, Bizkaia kalean jarriko da, eta eremu horretako irisgarritasuna nabarmen hobetzea ahalbidetuko du, aldapa handiak baititu. Proiektuak Araba eta Gaztela-Mantxa kaleen artean ibilbide irisgarri bat sortzea aurreikusten du, inguruko bizilagunen eguneroko mugikortasuna erraztuz eta Nafarroa kalean dagoen arrapala mekanikoarekin lotuz.

"Arrapala berriak Bizkaia kaleko 39. eta 47. portalen artean jarriko dira, malda % 10,5era iristen den eremu batean, eta horrek zirkulazioa zailtzen du, bereziki adinekoentzat, mugikortasun urriko pertsonentzat edo haur-orgak dituzten familientzat", azaldu du Jon Andoni Uria Auzoetarako eta Hirirako Obretako zinegotziak

Proiektuak ondoz ondoko hiru arrapala mekaniko instalatzea aurreikusten du. Lehenengo arrapalak 29,66 metroko luzera eta 5,37 graduko inklinazioa izango ditu; bigarrenak 7,66 metroko luzera eta 5,44 graduko inklinazioa; eta hirugarrenak 31,17 metro, 4,10 graduko inklinazioarekin.

Bideozaintza duten arrapalak

Halaber, arrapalek bideozaintza eta teleaginte-sistemak izango dituzte, haien funtzionamendua denbora errealean gainbegiratzeko eta instalazioak behar bezala mantentzen direla bermatzeko.

Jarduketa hori aprobetxatuz, proiektuak ingurutik igarotzen diren hiri-azpiegiturak modernizatzea ere ahalbidetuko dio Udalari. Horien artean, honako hauek nabarmentzen dira: egungo ur-hornidurako sarea ordeztea, dagoen saneamendu-sarea berritzea bi sare bereizi sortzeko, eta argiteria publikoko, sare elektrikoetako, gaseko edo telekomunikazioetako sare berri bat ezartzea.

Esku-hartzeak ingurua berrurbanizatzea ere barne hartuko du, eta obrek ukitutako zoladura eta hiri-altzariak berrezartzea. Espaloiak lehendik dagoenaren antzeko baldosarekin zolatuko dira; arrapalen inguruan, berriz, zeramikazko galtzada-harria jarriko da. Era berean, ukipen-baldosa jarriko da irisgarritasuna hobetzeko, baita granitozko zintarri berriak eta granitozko lauzaz estalitako horma bat ere. Halaber, obretan zehar erretiratutako hiri-altzarien elementuak birkokatuko dira, hala nola bankuak, paperontziak eta seinaleztapena.